ޢަބްދުލްބާސިޠު މުޙައްމަދު ވ. ޕްރޮސިކިއުޓަރ ޖެނެރަލްގެ އޮފީސް

ކްރިމިނަލް ކޯޓުން ދައުލަތުގެ ހެކިންގެ ހެކިބަހުން ކުށް ސާބިތުކޮށް، ޤާނޫނު ނަންބަރު 75/4 ގެ 13 ވަނަ މާއްދާގެ (ހ) ގެ ދަށުން 10 އަހަރާއި (ށ) ގެ ދަށުން 5 އަހަރު، ޖުމްލަ 15 އަހަރު ޖަލަށްލުމަށް ޙުކުމްކުރި.

2008 ވަނަ އަހަރު އިސްތިއުނާފުކުރި ފަރާތް ސައިކަލަކަށް އަރާއިރު، އޭނާގެ އަތުގައި ތިންފޫޓުބައި ހުންނަ ވަރުގެ ކަނޑިއެއް އޮތްތަން ފުލުހުން ދުށްކަމަށް ބުނެ، ހަނގުރާމަވެރި ހަތިޔާރު ދިވެހިރާއްޖެއަށް އެތެރެކޮށް ގެންގުޅުމުގެ ކުށުގެ ދަޢުވާ 2011 ވަނަ އަހަރު ދައުލަތުން އުފުލި. އޭނާ ދަޢުވާއަށް އިންކާރުކުރި.

އިސްތިއުނާފުކުރި ފަރާތުން ބުނީ، ތަޙުޤީޤު ކުރެވިފައިނުވާ ކުށެއްގެ މައްޗަށް ދަޢުވާކުރި ކަމަށާއި، ޤާނޫނު ނަންބަރު 2010/17 ގެ ލުއި އަދަބު ޤާނޫނުއަސާސީގެ 59 ވަނަ މާއްދާގެ (ހ) ގެ ދަށުން ލިބިދޭންޖެހޭ ކަމަށާއި، ހެކިތައް ޝައްކެއްނެތް މިންވަރަށް ކުށް ސާބިތުކުރުމަށް ނުފުދޭ ކަމަށާއި، ދިފާޢީ ހެކިން ޙާޟިރުނުކުރި ކަމަށާއި، މާރާމާރީގެ ކުށުގެ އަދަބު ލިބިފައިވަނިކޮށް ހަމަ އެ ޢަމަލަށް ދެވަނަ ދަޢުވާއެއް ކުރުމަކީ ޤާނޫނުއަސާސީގެ 60 ވަނަ މާއްދާގެ (ހ) އާ ޚިލާފު ކަމަށެވެ.

ހަނގުރާމަވެރި ހަތިޔާރު ދިވެހިރާއްޖެއަށް އެތެރެކޮށް ގެންގުޅުމުގެ ކުށުގެ ދަޢުވާ ތަޙުޤީޤު ނުކުރެވި އުފުލިތޯ، މާރާމާރީގެ ކުށުގެ އަދަބު ލިބިފައިވަނިކޮށް މި ދަޢުވާ އުފުލުމަކީ ޤާނޫނުއަސާސީގެ 60 ވަނަ މާއްދާގެ (ހ) އާ ޚިލާފުތޯ، ދިފާޢީ ހެކިން ޙާޟިރުނުކުރުމާއި ހެކީގެ ކަފާއަތް، އަދި ޤާނޫނު ނަންބަރު 2010/17 ގެ ލުއި އަދަބު ޤާނޫނުއަސާސީގެ 59 ވަނަ މާއްދާގެ (ހ) ގެ ދަށުން ލިބިދޭންޖެހޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ހައިކޯޓުން ދެކުނީ، ތަޙުޤީޤުގައި އިސްތިއުނާފުކުރި ފަރާތް ޙައްޤުތަކުން މަޙްރޫމްކުރިކަމުގެ ހެއްކެއް ނެތް ކަމަށާއި، މާރާމާރީއާއި ހަތިޔާރު އަތުގައި އޮތުމަކީ ތަފާތު ދެކުށް ކަމަށާއި، ދިފާޢީ ހެކިން ޙާޟިރުނުކުރުމަކީ ޤާނޫނާ ޚިލާފު ކަމެއް ނޫން ކަމަށާއި، ދައުލަތުގެ ތިން ހެކިންގެ ހެކިބަހަށް ތަޢުނުކުރެވޭ ވަރުގެ ފުށުއެރުމެއް ދައްކާފައި ނުވާ ކަމަށާއި، ޤާނޫނު ނަންބަރު 75/4 ގެ ކުށުގެ އަދަބަށް ލުޔެއް ގެނެސްފައި ނުވާތީ ލުއި އަދަބު ނުލިބޭނެ ކަމަށެވެ.