ޢަބްދުﷲ ޔާމީން ޢަބްދުލްޤައްޔޫމް ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ކުށްކޮށްގެން ހޯދި ކަމަށް ބުނާ ޑޮލަރާއި އެ ފައިސާ އިންވެސްޓްކޮށް ލިބުނު މަންފާ ހަ މަސްދުވަހުގެ ތެރޭގައި ދައުލަތަށް ދެއްކުމަށް އަމުރުކުރިއެވެ.

ކްރިމިނަލް ކޯޓުގެ C/2021-698/Cr ޤަޟިއްޔާއިން މަނީ ލޯންޑަރކުރުމުގެ ކުށް ސާބިތުވެ ޖަލާއި ޖޫރިމަނާއަށް ޙުކުމްކުރިއެވެ. ދަޢުވާގައި ފައިސާ ދައުލަތަށް ނެގުމަށް އެދިފައިވި ނަމަވެސް ޙުކުމުގައި އެ އަމުރު ނުހިމެނުނެވެ. ޙުކުމަށް ދުވަސްތަކެއްފަހުން ދައުލަތުން ފޮނުވި ސިޓީއަކަށް ބިނާކޮށް ވަކި އަމުރެއް ނެރުނެވެ.

އިސްތިއުނާފުކުރި ފަރާތުން ބުނީ މި އަމުރު ނެރެވޭނީ ޙުކުމުގައި ހިމަނައިގެން ކަމަށާއި ޤާނޫނުގައި ނެތް އިޖުރާއަތެއްގެ ދަށުން ނެރެފައިވާކަމަށެވެ. ދައުލަތުން ބުނީ ޙުކުމަށްފަހުވެސް އަމުރު ނެރެވޭނެކަމަށާއި، އެއީ ރަނގަޅުކުރެވޭނެ އިޖުރާއީ ޢައިބެއް ކަމަށެވެ.

މަނީ ލޯންޑަރކުރުމުގެ ކުށް ސާބިތުވެ ޙުކުމްކޮށް މައްސަލަ ނިމުމަށްފަހު، ޙުކުމުގައި ނުހިމެނުނު ކުށްކޮށްގެން ހޯދި ފައިސާ ދައުލަތަށް ނެގުމުގެ އަމުރު، ދައުލަތުން ފޮނުވި ސިޓީއަކަށް ބިނާކޮށް ދަޢުވާލިބުނު ފަރާތުގެ ބަހެއް ނުހޯދައި ވަކި އަމުރެއްގެ ގޮތުގައި ނެރުމަކީ ޖިނާއީ އިޖުރާއަތުގެ ޤާނޫނާއި އިންސާފުވެރި ޝަރީޢަތުގެ އުޞޫލުތަކާ އެއްގޮތްވާ ކަމެއްތޯ.

ކްރިމިނަލް ކޯޓުގެ އަމުރު ބާޠިލު

ޙުކުމުގައި ހިމަނަންޖެހޭ އަމުރު ހިމަނާފައިނުވާއިރު، އޭގެ ޙައްލަކީ އިސްތިއުނާފެވެ. އަމުރު ނެރެފައިވަނީ އަމުރު ރައްދުވާ ފަރާތުގެ ބަހެއް ނުހޯދައި، އަސާސީ ޙައްޤުތަކަށް އަސަރުކުރާ ގޮތަށް ކަމުން، އެއީ ރަނގަޅުކުރެވޭނެ ޢައިބެއް ނޫނެވެ.