ޢަބްދުﷲ ޖާމިޢު ވ. އެޓަރނީ ޖެނެރަލްގެ އޮފީސް

ޖިނާއީ ބައި ސާބިތު ނުވުމަކީ އަޚްލާޤީ ކުށުގެ އިދާރީ ފިޔަވަޅުގެ މަދަނީ ބައި ނަފީކުރާ ކަމެއް ނޫންކަމަށް ބުނެ، ވަޒީފާއާއި ޢިނާޔަތްތައް ދިނުމަށް އަންގާނެ ތަނެއް ނެތްކަމަށް ސިވިލް ކޯޓުން ޙުކުމް ކުރިއެވެ.

ފުލުހުންގެ ވަޒީފާގައި ހުއްޓާ ރޯދަމަހު ދުވާލު ފެންބޮއި ރޯދަ ދޫކޮށްލުމުގެ ކުށް ޖިނާއީ ކޯޓުގައި ސާބިތުވެ ވަޒީފާއިން ވަކިކުރުމަށްފަހު، ހައިކޯޓުން 2009/HC-A/261 ގައި ޙުކުމް ބާޠިލުކުރިއެވެ. ވަޒީފާ އަނބުރާ ދިނުމަށް ފުލުހުންނަށް އެދުމުން ނުދޭން ނިންމުމުން ވަޒީފާއާއި މުސާރައާއި ޢިނާޔަތްތަކަށް އެދި ސިވިލް ކޯޓަށް ދަޢުވާ ކުރިއެވެ.

އިސްތިއުނާފުކުރި ފަރާތުން ބުނީ ޤާނޫނުއަސާސީގެ 37 ވަނަ މާއްދާ ހަނިކޮށް މާނަކުރި ކަމަށާއި، ތަޙުޤީޤީ ބަޔާންތަކުގެ ފުށުއެރުންތައް ބަލާފައި ނުވާކަމަށާއި، ވަކިކުރި ސަބަބު ނެތިގެން ދިޔަ ކަމަށާއި، ސުޕްރީމް ކޯޓުގެ 2014/SC-A/24 ތަޠުބީޤުކުރުމުގައި ވާޤިޢާތަކުގެ ތަފާތަށް ބަލާފައި ނުވާ ކަމަށެވެ. އެޓަރނީ ޖެނެރަލްގެ ފަރާތުން ބުނީ ޤާނޫނުއަސާސީގެ 37 ވަނަ މާއްދާއިން އިޚްތިޔާރުކުރާ ވަޒީފާއެއް ލިބިދިނުން ލާޒިމު ނުކުރާ ކަމަށެވެ.

ޖިނާއީ ކުށެއް ސާބިތުވުމާ ގުޅިގެން ފުލުހުންގެ ވަޒީފާއިން ވަކިކުރި މުވައްޒަފެއްގެ ޙުކުމް އިސްތިއުނާފުގައި ބާޠިލުވުމުން، ވަޒީފާ އަނބުރާ ދިނުމާއި އެދުވަސްތަކުގެ ޙައްޤުތައް ދިނުމަށް ނުއަންގާ ސިވިލް ކޯޓުން ނިންމުމަކީ ޤާނޫނުއަސާސީގެ 37 ވަނަ މާއްދާ ހަނިކޮށް މާނަކުރުމެއް ތޯ؛ އަދި ޖިނާއީ މައްސަލައިން ދޫކޮށްލުމަކީ ވަޒީފާއިން ވަކިކުރުމުގެ އިދާރީ ފިޔަވަޅު ނަފީކުރާ ކަމެއް ތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ޤާނޫނުއަސާސީގެ 37 ވަނަ މާއްދާއިން ކަށަވަރުކޮށްދެނީ މަސައްކަތެއް ކުރުމުގެ ފުރުޞަތެވެ، ވަކި ވަޒީފާއެއް ނޫނެވެ. ވަކިކުރީ ޖިނާއީ ކުށެއް ސާބިތުވުމުން ޤަވާޢިދުގެ 24(ހ) ގެ ދަށުންނެވެ. ޝައްކުގެ މަންފާއިން ދޫކޮށްލުމަކީ ތައުދީބީ ފިޔަވަޅަށް ހުރަހެއް ނޫނެވެ، އަދި އެ ދެ އަޑުއެހުމުގެ މިންގަނޑު ތަފާތެވެ.