ޢަބްދުﷲ އާސިމް ވ. މިނިސްޓްރީ އޮފް ޓޫރިޒަމް

ސިވިލް ކޯޓުން fumus boni juris ޤާއިމުވާކަމަށް ބުރަވެ، އިސްތިއުނާފުކުރި ފަރާތުގެ އެކައުންޓްތައް ފްރީޒްކޮށް، ކުންފުނިތަކުގައިވާ ޙިއްޞާ ވިއްކުން ފަދަ މުޢާމަލާތް ހުއްޓުވިއެވެ. ވަކި ޤާނޫނީ ޝަޚްޞެއް ކަމަށްވާ ކުންފުންޏެއްގެ އެކައުންޓްތައް ފްރީޒް ނުކުރެވޭނެކަމަށް ނިންމިއެވެ.

ރިސޯޓު ތަރައްޤީކުރުމަށް ރަށެއް ކުއްޔަށް ހިފުމުގެ ލީސް އެކުއިޒިޝަން ކޮސްޓުގެ ގޮތުގައި ދައުލަތަށް ލިބެންޖެހޭ 400,000 ޑޮލަރުގެ ދެ ޗެކު އިސްތިއުނާފުކުރި ފަރާތުގެ އެކައުންޓަށް ޖަމާކުރިކަމަށް ބުނެ، ފައިސާ އަނބުރާ ހޯދުމަށް މިނިސްޓްރީ އޮފް ޓޫރިޒަމުން ސިވިލް ކޯޓުގައި ދަޢުވާކޮށް ވަގުތީ އަމުރަކަށް އެދުނެވެ.

ސުޕްރީމް ކޯޓުގެ 2012/SC-A/21 ގެ ޝަރުޠުތައް ފުރިހަމަނުވާކަމާއި، ވަކީލެއްގެ އެހީތެރިކަން ހޯދުމުގެ ފުރުޞަތު ނުދީ ނިންމިކަމާއި، ދަޢުވާލިބޭ ފަރާތުގެ މަޞްލަޙަތަށް ރިޢާޔަތްނުކުރާކަމާއި، ޤާނޫނާ ޚިލާފަށް ހޯދި ހެކީގެ މައްޗަށް ބިނާކުރިކަމަށް އިސްތިއުނާފުކުރި ފަރާތުން ބުނެފައިވެއެވެ.

ދައުލަތަށް ލިބެންޖެހޭ ފައިސާ ހޯދުމުގެ މައްސަލައެއްގައި ދަޢުވާލިބޭ ފަރާތުގެ ބޭންކް އެކައުންޓްތައް ފްރީޒްކޮށް ކުންފުނިތަކުގެ ޙިއްޞާ ބަދަލުކުރުން ހުއްޓުވި ވަގުތީ އަމުރު ނެރުނީ ވަގުތީ އަމުރު ނެރުމުގެ ޝަރުޠުތަކާއި، ދެފަރާތަށް ލިބިދާނެ ގެއްލުމަށް ރިޢާޔަތްކޮށްތޯ.

ވަގުތީ އަމުރު ބާޠިލު

ޖަވާބުދާރީވުމުގެ ފުރުޞަތު ނުދިނުން އެކަނި ބާޠިލުކުރާ ސަބަބެއް ނޫންކަމާއި، ދައުލަތަށް ޞިފަތާއި fumus boni juris ޤާއިމުވާކަމާއި، ނަމަވެސް ގެއްލުމަކީ ކަނޑައެޅިފައިވާ ޢަދަދަކަށްވާއިރު ދެފަރާތަށް ލިބިދާނެ ގެއްލުމާއި، ބަދަލު ދިނުމުގެ ޤާބިލުކަމާއި، ހުރަހަކީ ކޮބައިކަން ބައްލަވާފައި ނުވާތީ އަމުރު ބާޠިލުކުރިއެވެ.