ޢާފިޔާ ޢަބްދުއްރައްޒާޤު ވ. މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރ

5 ފޫޓު ހަމަވާ ގޯޅިމަގަށް ދޮރު ކެނޑުން ހުއްދަކުރާ މާލޭ މުނިސިޕަލްޓީގެ އިޢުލާނާ އެއްގޮތަށް ދީފައިވާ ހުއްދައެއް ކަމުން، އެ ހުއްދަ ބާޠިލުކޮށް ދޮރު ބަންދުކުރަން އަންގާނެ ހަމައެއް ނެތް ކަމަށް ސިވިލް ކޯޓުން ޙުކުމްކުރިއެވެ.

ބެހެނިވެރިންގެ މެދުގައި ބައިކުރެވުނު ގޯއްޗެއްގެ އެއް ބަޔަށް، ގޯތިން ނެގި ގޯޅިމަގަށް ދޮރު ކެނޑުމަށް ހައުސިންގ ވުޒާރާއިން ހުއްދަ ދިނުމުން، އެ ހުއްދަ ބާޠިލުކޮށް ދޮރު ބަންދުކުރުމަށް އެދި ބެހެނިވެރިއަކު ދައުލަތަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ އިޢުލާނަކީ ޤާނޫނުއަސާސީއާ ޚިލާފަށް ޝާއިޢުނުކުރާ، ޤަވާޢިދެއް ނޫން އެއްޗެއް ކަމަށާއި، ސުޕްރީމް ކޯޓުގެ މިންގަނޑުތަކާއި ހަމަހަމަކަމުގެ ޙައްޤާއި ގޯތި ބެހުނު ޙުކުމާ ޚިލާފަށް ނިންމި ކަމަށާއި ފަނޑިޔާރުގެ މުސްތަޤިއްލުކަމަށް އަސަރުކުރާ ކަމަށެވެ.

ބައިކުރެވުނު ގޯއްޗެއްގެ ގޯޅިމަގަށް ދޮރު ކެނޑުމަށް ވުޒާރާއިން ދިން ހުއްދައަކީ، 2008 ގެ ޤާނޫނުއަސާސީގެ ކުރިން ނެރުނު މާލޭ މުނިސިޕަލްޓީގެ އިޢުލާނަކަށް ބިނާކޮށް ދީފައިވާތީ، އަދި ގޯތި ބެހުނު ޙުކުމާ ޚިލާފުވާތީ، ބާޠިލު ހުއްދައެއްތޯ؛ އަދި ދަށުކޯޓުގެ ފަނޑިޔާރުގެ މުސްތަޤިއްލުކަމާ ގުޅޭ ޝަކުވާއަކީ އިސްތިއުނާފީ ނުކުތާއެއްގެ ގޮތުގައި ބަލައިގަނެވޭނެ ކަމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އިޢުލާނަކީ ޝާއިޢުކޮށްފައިވާ، އަސާސީ ޙައްޤަކާ ތަޢާރުޟު ނުވާ، ބާޠިލު ނުވާ އިޢުލާނެއް ކަމާއި، ހުއްދަ ދީފައިވަނީ ވުޒާރާގެ ބާރުގެ ދަށުން ކަމާއި، ގޯތި ބެހުނު ޙުކުމުގައި ދޮރުކެނޑުން މަނާކޮށްފައި ނުވާކަމާއި، ފަނޑިޔާރަށް ކުރާ ތުހުމަތަކީ އިސްތިއުނާފުގައި ބެލޭނެ ކަމެއް ނޫންކަމަށް ބަލައި ޙުކުމް ޤާއިމުކުރިއެވެ.