ޕްރޮސިކިއުޓަރ ޖެނެރަލް ވ. އިބްރާހީމް ޝާހިދު

ކްރިމިނަލް ކޯޓުން އިތުރަށް ބަންދުކުރަންޖެހޭ ސަބަބެއް ނެތްކަމަށް ބުނެ 18 މާރިޗު 2018 ގައި ބަންދުން ދޫކޮށްލިއެވެ.

އިތުރު ބަޔަކާ ބައިވެރިވެ ތޫނު ހަތިޔާރު ބޭނުންކޮށްގެން މާރާމާރީ ހިންގިކަމަށް ތުހުމަތުކުރެވޭ ފަރާތެއްގެ ބަންދު އިތުރުކުރަން ފުލުހުން އެދުނީ ހެކި ނައްތާލާފާނެތީ އާއި، ހައްޔަރުކުރިއިރު މަސްތުގެ ޙާލުގައި ހުރިކަމަށް ތުހުމަތުކުރެވޭތީ މުޖުތަމަޢުގެ ސަލާމަތަށްޓަކައެވެ. ސީނުން ތޫނު ހަތިޔާރު ފެނުނުކަމާއި ޑީއެންއޭ ހެކި ހުރިކަން ފޯމުގައި ބަޔާންކޮށްފައި ވިއެވެ.

ޕްރޮސިކިއުޓަރ ޖެނެރަލްގެ އޮފީހުން ބުނީ، އަމުރަކީ ޤާނޫނުއަސާސީގެ 49 އާއި ޖިނާއީ އިޖުރާއާތުގެ ޤާނޫނުގެ 22 (ނ)، 59، 60 އާއި ހަތިޔާރުގެ ޤާނޫނުގެ 12 ވަނަ މާއްދާއާ ޚިލާފު، އަދި 80 (ހ) އަށް ރިޢާޔަތްނުކޮށް ނެރުނު އަމުރެއް ކަމަށެވެ.

ތޫނު ހަތިޔާރު ބޭނުންކޮށްގެން މާރާމާރީ ހިންގިކަމަށް ތުހުމަތުކުރެވޭ ފަރާތެއް އިތުރަށް ބަންދުކުރަންޖެހޭ ސަބަބެއް ނެތްކަމަށް ބުނެ ދޫކޮށްލި ކްރިމިނަލް ކޯޓުގެ އަމުރު ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއާތުގެ ޤާނޫނުގެ 59 އަދި 60 ވަނަ މާއްދާއާ އެއްގޮތްތޯ.

ދަށުކޯޓުގެ އަމުރަށް ބަދަލު ގެނައުން ލާޒިމުކަމަށް ކަނޑައެޅި؛ ބަންދަށް އެދި ކްރިމިނަލް ކޯޓަށް ހުށަހަޅައިފިނަމަ މި ޙުކުމުގެ އަލީގައި އަލުން ނިންމަން ޖެހޭނެކަމަށް ކަނޑައެޅި

ތުހުމަތުގެ ބާވަތާއި ނުރައްކާތެރިކަމަށް ބަލާއިރު ޤާނޫނުއަސާސީގެ 49 ވަނަ މާއްދާގެ ޙާލަތެއް ވާނަމަ ޝަރީޢަތް ނިމެންދެން ބަންދުގައި ހުންނަންޖެހޭތީ އަމުރަށް ބަދަލު ގެންނަންޖެހޭ ކަމާއި، ނަމަވެސް ދަޢުވާ ކްރިމިނަލް ކޯޓުގައި ހިނގަމުންދާތީ ބަންދާމެދު ނިންމަންވާނީ އެ މައްސަލަ ބައްލަވާ ފަނޑިޔާރު ކަމަށް ކޯޓު ދެކުނެވެ.