ޕްރޮސިކިއުޓަރ ޖެނެރަލް ވ. ޢަބްދުﷲ ރަޝީދު

ކްރިމިނަލް ކޯޓުން ޗެއިން އޮފް ކަސްޓަޑީ ފޯމުތައް ގަވާއިދާ އެއްގޮތް ނުވާތީ މައްސަލަ މައުޟޫޢީ ގޮތުން ބަލަންޖެހޭ ތަނެއް ނެތްކަމަށް ބުނެ، ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 120 ވަނަ މާއްދާގެ ދަށުން ދަޢުވާ ފޯމު ބާޠިލުކުރިއެވެ.

ޑައިމޯފިން ޓްރެފިކްކުރުމުގެ ދަޢުވާއެއްގައި ދަޢުވާލިބޭ ފަރާތުން ޝަރީޢަތުގެ ކުރިން ހުށަހަޅައި، މަސްތުވާތަކެތީގެ ތަޙްލީލު ރިޕޯޓާއި މާއްދީ ހެކި ހުށަހެޅިކަން އަންގައިދޭ ލިޔުން ބަލައިނުގަތުމަށް އެދުނެވެ.

ޕީޖީ އިން ބުނީ ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 120 ވަނަ މާއްދާ ހިނގަނީ ޤާނޫނުލްޢުޤޫބާތުގެ 60 ވަނަ ބާބުގެ ދިފާޢެއް ސާބިތުކޮށްފިނަމަ ކަމަށާއި، އެފަދަ ދިފާޢެއް ހުށަހަޅާފައި ނުވާ ކަމަށެވެ.

ޖިނާއީ އިޖުރާއަތުގެ ޤާނޫނުގެ 119 (ހ) (3) ގެ ދަށުން ހެއްކެއް ބަލައިނުގަތުމަށް ހުށަހަޅާ ޝަރީޢަތުގެ ކުރީގެ ހުށަހެޅުމެއްގެ ސަބަބުން، ޖިނާއީ އިޖުރާއަތުގެ ޤާނޫނުގެ 120 ވަނަ މާއްދާއަށް ޙަވާލާދީ ދަޢުވާ ފޯމު ބާޠިލުކޮށް މައްސަލަ މައުޟޫޢީ ގޮތުން ނުބަލާ ނިންމިދާނެތޯ.

ދަށުކޯޓުގެ ނިންމުން ބާޠިލު، އަލުން ބެލުމަށް ކްރިމިނަލް ކޯޓަށް ފޮނުވި

ހެއްކެއް ބަލައިނުގަތުމަށް ހުށަހަޅާ ހުށަހެޅުމަކީ ދަޢުވާއަށް ހުރަހަކަށްވާ ދިފާޢެއް ނޫންކަމުން ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 120 ވަނަ މާއްދާ ތަޠުބީޤުވާ ޙާލަތެއް ނުއުފެދެއެވެ؛ ޖިނާއީ އިޖުރާއަތުގެ ޤާނޫނުގެ 119 ވަނަ މާއްދާއިން ދަޢުވާ ބާޠިލުކުރުމުގެ ބާރެއް ނުދެއެވެ.