އިސްމާޢީލް ޝުޖާޢު ވ. ކާސްޓް އަވޭސް މޯލްޑިވްސް ޕވޓ ލޓޑ

ސިވިލް ކޯޓުން ޗެކުތަކުގެ ފައިސާ ދަރަންޏަށް ދިންކަން ޘާބިތުނުވާކަމަށް ކަނޑައަޅައި، ޙުސައިން ޙިލްމީ އިޢުތިރާފުވި 7,250,000.00ރ. ދެއްކުމަށް ޙުކުމްކޮށް، ކުންފުނީގެ މައްޗަށް މަދަނީ ޒިންމާއެއް ނެތްކަމަށް ކަނޑައެޅި.

އިސްމާޢީލް ޝުޖާޢުގެ އަތުން ޙުސައިން ޙިލްމީ ނަގުދު ފައިސާ ނަގައި، އެ ފައިސާ އަނބުރާ ދެއްކުމަށް ކާސްޓްއަވޭ މޯލްޑިވްސް ކުންފުނީގެ އެކައުންޓުތަކުން 17 ޗެކް ދޫކުރި؛ އެ ޗެކްތައް ރިޓާންވުމުން ބަދަލުގައި ދޫކުރި ޖުމްލަ US$3,726,977.00 ގެ 3 ޗެކު ވެސް ފައިސާ ނެތިގެން ރިޓާންވި.

އިސްތިއުނާފުކުރި ފަރާތުން ބުނީ އަމިއްލަ އިޚްތިޔާރުގައި ސޮއިކުރި އެއްބަސްވުމާއި ޗެކުތަކުގެ ޤާނޫނީ ނަތީޖާއަށް ނުބަލާ، ސުޕްރީމް ކޯޓުގެ ސަވާބިޤަށް ޚިލާފަށް، ޖިނާއީ މިންގަނޑަށް ބަލައި، 16/95 ގެ 21 ވަނަ މާއްދާއާ ޚިލާފަށް ނިންމި ކަމަށެވެ. ރައްދުވާ ފަރާތުން ބުނީ ބިރުދައްކައިގެން ސޮއިކުރުވިކަމަށާއި ދަރަންޏަށް ނެގީ 7,250,000.00ރ. އެކަނިކަމަށެވެ.

ކުންފުންޏެއްގެ އެކައުންޓުން އެ ކުންފުނީގެ ފަރާތުން ސޮއިކޮށް ދޫކޮށް ރިޓާންވި 3 ޗެކުގައިވާ ފައިސާ، ޗެކު ދޫކުރި ފަރާތާއި ކުންފުނިން ދައްކަންޖެހޭތޯއާއި، ޗެކާއި އެއްބަސްވުންތަކަށް ބިރުދައްކައިގެން ސޮއިކުރުވިކަމަށް ބުނާ ދިފާޢު ސާބިތުކުރުމުގެ ބުރަ އުފުލަންޖެހެނީ ކާކުތޯ.

ދަށުކޯޓުގެ ޙުކުމް ބާޠިލު؛ ޙުސައިން ޙިލްމީއާއި ކުންފުނިން US$3,726,977.00 ދައްކަން އަޣްލަބިއްޔަތުން ޙުކުމްކުރި

ބިރުދެއްކިކަމުގެ ދިފާޢު ސާބިތުކުރުމުގެ ބުރަ އުފުލަންޖެހެނީ ރައްދުވާ ފަރާތަށް، އަދި އެކަމުގެ ހެއްކެއް ނުހުށަހަޅައި ފުލުހުންނަށް ހުށަހެޅީ ސިވިލް މައްސަލައަށް ފަހުގައެވެ؛ ޝަކުލިއްޔާތު ފުރިހަމަ ޗެކަކީ ޢަދަދު އަދާކުރުމުގެ ހަރުދަނާ ހެއްކެކެވެ؛ 7,250,000.00ރ. ގެ މުޢާމަލާތަކީ ނިމިފައިވާ ތަފާތު މުޢާމަލާތެކެވެ.