އިސްމާޢީލް ރިޟާ ވ. އިސްމާޢީލް ޝުޖާޢު

ސިވިލް ކޯޓުން، 408,000 ރ ކަނޑާ ބާކީ 1,592,000 ރ ޔޫސުފް ރިޟާ ދައްކަންޖެހޭކަން މަދަނީ މިންގަނޑުން ސާބިތުވާކަމަށް ކަނޑައަޅައި 4 މަހުގެ ތެރޭގައި ދެއްކުމަށް ޙުކުމްކުރިއެވެ.

އިސްމާޢީލް ރިޟާ ދިން ޗެކެއް ބައުންސްވެ ކްރިމިނަލް ކޯޓުގައި ޖިނާއީ މައްސަލައެއް ހިނގަމުންދަނިކޮށް، 22 މެއި 2010 ގައި އޭނާގެ ކޮއްކޮ ޔޫސުފް ރިޟާ އެ ފައިސާއަށް ޖާމިނުވެ، 2,000,000 ރ އިސްމާޢީލް ޝުޖާޢަށް ދައްކާނެކަމަށް އެއްބަސްވުމެއްގައި ސޮއިކުރިއެވެ؛ ބާކީ ފައިސާ ހޯދުމަށް ޝުޖާޢު ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ހެކި ވަޒަންކުރުމުގައި ހެއްކާބެހޭ ޤާނޫނާ ޚިލާފުވެފައިވާކަމަށާއި، އެއްބަސްވުމަކީ ޙަޤީޤަތް އޮޅުވާލައިގެން ހެދި ކޮންޓްރެކްޓާބެހޭ ޤާނޫނާ ޚިލާފު ބާޠިލު އެއްބަސްވުމެއްކަމަށާއި، ހެކިން ޙާޟިރުކުރުމުގެ ޙައްޤާއި ސުޕްރީމް ކޯޓުގެ ސާބިގާތަކަށް ރިޢާޔަތް ނުކުރިކަމަށެވެ.

އެހެން މީހެއްގެ ޗެކު ބައުންސްވުމުގެ ޖިނާއީ މައްސަލައެއްގައިވާ ފައިސާ ދެއްކުމަށް ޖާމިނުވެ ސޮއިކުރި އެއްބަސްވުމަކީ ޙަޤީޤަތް އޮޅިގެން ވެވުނު ބާޠިލު އެއްބަސްވުމެއްތޯއާއި، އެ އެއްބަސްވުމުގެ ދަށުން ފައިސާ ދައްކަން ޖެހޭތޯ.

ދަށުކޯޓުގެ ޙުކުމް ބާޠިލު

ބައުންސްވި ޗެކަކީ އޯނަސް ޕްރައިވެޓް ލިމިޓެޑަށް ދޫކުރި ޗެކެއްކަމާއި ޖިނާއީ މައްސަލައިގެ ލިޔުންތަކުންވެސް އެ ފައިސާއަކީ ޝުޖާޢަށް ދައްކަންޖެހޭ ފައިސާއެއްކަން ނޭނގޭކަމާއި، ކުންފުންޏަކީ ވަކި ޝަޚްޞެއްކަމުން ޝުޖާޢަށް ފައިސާ ލިބެންޖެހޭކަން ސާބިތުނުވާތީ، ޖާމިނުވި ފަރާތް ސޮއިކުރީ ޙަޤީޤަތް އޮޅިގެން ކަމަށާއި އެއްބަސްވުމަކީ ބާޠިލު އެއްބަސްވުމެއްކަމަށް ކަނޑައެޅިއެވެ.