ފާޠިމަތު އިބްރާހީމް ވ. މުޙައްމަދު ޒަކީ

ފެމިލީ ކޯޓުން ތަރިކަ 16 ބައިން ބަހައި، ހުވަފަތް އަނބިއަށް 2/16 އާއި ދެ ފިރިހެން ދަރިންކުރެ ކޮންމެ މީހަކަށް 7/16 މިލްކުވާކަމަށް ޙުކުމްކުރިއެވެ.

2010 ގައި ނިޔާވި މީހެއްގެ ތަރިކައިގެ މައްސަލަ ނިންމައިދިނުމަށް އޭނާގެ ދަރިއަކު ފެމިލީ ކޯޓަށް ހުށަހެޅިއެވެ؛ އެ ދަރިފުޅު ވާރިޘަކަށް ކަނޑައެޅީ 1992 ގައި ކޯޓު ނަންބަރު 1 ން ނަސަބު ކަނޑައެޅި ޙުކުމުގެ މައްޗަށެވެ.

އިސްތިއުނާފުކުރި ފަރާތްތަކުން 8 ނުކުތާ ހުށަހެޅިއިރު، އެ ހުރިހާ ނުކުތާއެއް ބިނާކޮށްފައިވަނީ 283/JC-1/1992 ގެ ޙުކުމަކީ ހެއްކާބެހޭ ޤާނޫނާއި އެހެނިހެން ޤާނޫނުތަކާ ޚިލާފު ޙުކުމެއްކަމަށެވެ.

ތަރިކަ ބެހުމުގެ ޙުކުމެއް އިސްތިއުނާފުކުރާ މައްސަލައެއްގައި، ވާރިޘަކު ވާރިޘަކަށް ކަނޑައެޅުމަށް ބިނާކުރި، ކުރިން ނިމިފައިވާ ނަސަބާބެހޭ ޙުކުމެއްގެ ޞައްޙަކަމާމެދު ސުވާލު އުފެއްދޭތޯއާއި، ތަރިކައިގެ ޙުކުމަށް ބަދަލު ގެންނަންޖެހޭ ސަބަބެއް އޮތްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

1992 ގެ ޙުކުމް އިސްތިއުނާފު ނުކުރެވި ނިހާއީވެފައިވާތީ މި އިސްތިއުނާފުގައި އޭގެ ޞައްޙަކަމާމެދު ބަޙުޘް ނުކުރެވޭނެއެވެ؛ ފެމިލީ ކޯޓުގެ ޙުކުމުގައި ކޯޓުތަކުގެ ޤާނޫނުގެ 38 ގައިވާ ކުށެއް އިސްތިއުނާފުކުރި ފަރާތްތަކުން ފާހަގަ ނުކުރެއެވެ.