ސިވިލް ސަރވިސް ކޮމިޝަން ވ. މުޙައްމަދު ވަސީމް

ވަޒީފާއާބެހޭ ޓްރައިބިއުނަލުން (67/VTR/2015) ވަކިކުރީ ވަޒީފާއާބެހޭ ޤާނޫނާ ޚިލާފަށްކަމަށް ކަނޑައަޅައި، ވަޒީފާގައި އަލުން ބަހައްޓައި، ވަކިކުރި ދުވަހުން ފެށިގެން ލިބެންވާ މުސާރައާއި ޢިނާޔަތް ދިނުމަށް އަމުރުކުރިއެވެ.

މޯލްޑިވްސް އެއަރޕޯޓްސް ކޮމްޕެނީގެ އޭވިއޭޝަން ސެކިއުރިޓީ ކޮމާންޑުގައި ވަޒީފާ އަދާކުރަމުން ދިޔަ މުވައްޒަފު، އިންޓެލިޖެންސުން ދީފައިވާ ސިއްރު މަޢުލޫމާތާއި ސެކިއުރިޓީ އެސެސްމަންޓަކަށް ބިނާކޮށް، ޤައުމީ ސަލާމަތާ ރައްކާތެރިކަމުގެ ވަޒީފާއެއްގައި ހުންނަ މުވައްޒަފެއްގެ މައްޗަށް އޮންނަންޖެހޭ އިތުބާރު ގެއްލިފައިވާކަމަށް ބުނެ ސިވިލް ސަރވިސް ކޮމިޝަނުން 06 މެއި 2015 ގައި ނޯޓިސް ނުދީ ވަޒީފާއިން ވަކިކުރިއެވެ.

ސިވިލް ސަރވިސް ކޮމިޝަނުން ބުނީ، ދިވެހި ސިވިލް ސަރވިސްގެ ޤަވާއިދުގެ 273 ވަނަ މާއްދާގެ ދަށުން ވަޒީފާގައި ބެހެއްޓުމުން ގެއްލުން ލިބިދާނެ ޙާލަތުގައި ޖަވާބުދާރީވުމުގެ ފުރުޞަތު ނުދީ ވަކިކުރެވޭތީ އިޖުރާއީ ޢަދުލުވެރިކަން ފުރިހަމަނުވާކަމަށް ބުނުމަކީ ގޯހެއްކަމާއި، މައްސަލައިގެ ޒާތަށް ނުބަލައި ވަޒީފާ އަނބުރާ ރުޖޫޢަކުރީ ގޯހުންކަމަށެވެ.

ޤައުމީ ސަލާމަތާ ގުޅޭ ވަޒީފާއެއްގައި ހުރި ސިވިލް ސަރވިސް މުވައްޒަފަކު އިތުބާރު ގެއްލިފައިވާކަމަށް ބުނެ ނޯޓިސް ނުދީ ދިވެހި ސިވިލް ސަރވިސްގެ ޤަވާއިދުގެ 273 (ށ) ގެ ދަށުން ވަޒީފާއިން ވަކިކުރުމުގައި އިޖުރާއީ ޢަދުލުވެރިކަން ފުރިހަމަވެފައިވޭތޯ؛ އަދި ޤާނޫނާ ޚިލާފަށް ވަކިކުރިކަމަށް ކަނޑައެޅުމުން ވަޒީފާއަށް އަނބުރާ ރުޖޫޢަކުރުމަކީ އެކަށީގެންވާ ފަރުވާއެއްތޯ.

ބައެއް ބަދަލުކުރި: ވަޒީފާގައި އަލުން ބެހެއްޓުމަށް ކުރި އަމުރު ބާޠިލުކޮށް، ވަކިކުރި ތާރީޚުން ފެށިގެން ޓްރައިބިއުނަލުން ނިންމި ދުވަހާ ހަމައަށް މުސާރައާއި ޢިނާޔަތް ދިނުމަށް އަމުރުކުރި

ކުރި ޢަމަލަކީ ކޮބައިކަން ކޮމިޝަނުން ސާފުކޮށްފައި ނުވާތީއާއި، ތުހުމަތު މުވައްޒަފަށް އަންގާފައި ނުވާތީއާއި، ގެއްލުން ލިބިދާނެކަމަށް ފެނުނު ހަމައަކީ އެކަށީގެންވާ ހަމައެއްކަން ސާބިތުކޮށްދީފައި ނުވާތީ އިޖުރާއީ ޢަދުލުވެރިކަން ޤާއިމުވެފައި ނުވެއެވެ. ނަމަވެސް ވަޒީފާގެ ބާވަތުން ވަޒީފާދޭ ފަރާތުގެ އިތުބާރު މުހިއްމުވާތީ ވަޒީފާ އަނބުރާ ރުޖޫޢަކުރުމަކީ ދެފަރާތަށް އެންމެ މަސްލަޙަތުހުރި ގޮތެއް ނޫނެވެ.