ޕްރޮސިކިއުޓަރ ޖެނެރަލްގެ އޮފީސް ވ. އަޙްމަދު އާފާޤް

މި މައްސަލާގައި ދަޢުވާލިބޭ ފަރާތުގެ މައްޗަށް ޖުމްލަ 4 ދަޢުވާއެއް އުފުލާފައިވެއެވެ. އޭގެ ތެރޭގައި 17/2014 (ޖިންސީ ކުށުގެ ޤާނޫނު) ގެ ދަށުން ދަޢުވާލިބޭ ފަރާތުގެ މައްޗަށް 2 ދަޢުވާއެއް ކޮށްފައިވެއެވެ. އެއީ ޖިންސީ ގޯނާ ކުރަން އުޅުމުގެ 2 ދަޢުވާއެކެވެ. ދަޢުވާލިބޭ ފަރާތް ޖިންސީ ގޯނާ ކުރަން އުޅެފައިވަނީ 16އ ފުރިފައިވާ ނަމަވެސް 18އ ނުފުރޭ 2 ކުއްޖަކަށެވެ.

މި މައްސަލައާ ގުޅިގެން ދައުލަތުން ހުށަހެޅު އަންނަނިވި ހެކިތައް ޝަރީޢަތުގެ މަރުޙަލާގައި މައްސަލަ ބައްލަވާ ފަނޑިޔާރު ކަނޑައަޅުއްވާ ޝަރުޠުތަކާ އެއްގޮތަށް އެތަކެތި ޝަރީޢަތުގެ މަޖިލީހުގައި ބަލައި ދިރާސާކުރުމުގެ އިންތިޒާމް ދަޢުވާލިބޭ މީހާއަށް ލިބޭ މިންވަރަށް ހެކި ހާމަކުރުމުގެ އަމުރެއް ނެރެދިނުމަށް ދައުލަތުން އެދިފައިވެއެވެ.

1- އަނިޔާލިބުނު ލުއުލުއަތު ޙަސަން ސިމާލް (16އ) ގެ އިންޓަރވިއު އޯޑިއޯ ވީޑިއޯ ރެކޯޑިންގ ސީޑީ (ފޯލިއޯ 121)

2- އަނިޔާލިބުނު ފާޠިމަތު އިންޝާ ބިންތް ފަޟީލް (16އ) ގެ އިންޓަރވިއު އޯޑިއޯ ވީޑިއޯ ރެކޯޑިންގ ސީޑީ (ފޯލިއޯ 120)

3- ޢަބްދުއްރަޙްމާން ބިން ޢަބްދުﷲ (16އ) ގެ އިންޓަރވިއު އޯޑިއޯ ވީޑިއޯ ރެކޯޑިންގ ސީޑީ (ފޯލިއޯ 129)

4- ރޫޝާ ރަމީޒް (15އ) ގެ އިންޓަރވިއު އޯޑިއޯ ވީޑިއޯ ރެކޯޑިންގ ސީޑީ (ފޯލިއޯ 128)

5- މޯބައިލް ފޮރެންސިކް ރިޕޯޓްތަކުގެ އެޕެންޑިކްސްތަކާއި، ސީޑީތައް (ފޯލިއޯ: 36، 37، 57، 122، 123، 125، 126)

6- ކޮމްޕިއުޓަރ ފޮރެންސިކް ރިޕޯޓް" އާ ގުޅޭ ސީޑީތައް (ފޯލިއޯ: 124)

ނަމަވެސް ޝަރީޢަތުން ނިންމަވާފައިވަނީ އެ ހެކިތައް، އެކްސަސް ކޮންޓްރޯލްކޮށް، ކޯޓުން ކަނޑައަޅާ ވަކި ވަގުތުތަކެއްގައި، ލޮގް ބެލެހެއްޓޭނެ ނިޒާމެއް ހަމަ ޖެހިއްޖެނަމަ، ދިފާއީ ވަކީލަށް އެކަނި އެކްސަސް އޮންނާނެ ގޮތަށް، ދިފާއީ ވަކީލަށް ކޯޓުން ބޭރުގައި ހުރެގެން ލިޔުންތައް ބެލެނޭ އިންތިޒާމް ހަމަޖެއްސުމުގެ ފުރުސަތު ދިނުމަށެވެ.

ސަބަބެއްކަމަށް ޝަރީޢަތުން ވިދާޅުވަނީ، ދިފާއީ ވަކީލު ކޯޓަށް ގެނެސްގެން ފޮޓޯ އާއި ވީޑިއޯ ދެއްކުމަކީ ކޯޓުގެވެސް އެތަކެއް ވަގުތާއި ވަޞީލަތް ހޭދަވާ ކަމަކަށްވުމުގެ އިތުރަށް އެފަދަ ހެކިތައް ބަލައި ދިރާސާކުރުމަށް ގިނަ ދުވަސް ނެގުމުގެ ސަބަބުން މައްސަލައިގެ ޝަރީޢަތް ދިގުލައި ދާތީކަމަށެވެ.ނަމަވެސް ކޯޓުން ބޭރުގައި ބެލޭނެ ފުރުޞަތު ދީފިނަމަ، ކޯޓުގެ ސިސްޓަމަށް ފްލެގް ނުވާގޮތަށް ރެކޯޑްކުރުމުގެ ފުރުޞަތު އޮތުމުންނާއި، މި މައްސަލާގައި ދަޢުވާ އުފުލުނީ 12/2009 ގެ ދަށުން ނޫންކަމުގައި ވީނަމަވެސް، މައްސަލާގައި އުމުރުން 18 އަހަރު ނުފުރޭ ކުދިން ހިމެނޭތީ، ހައިކޯޓުގެ 2021 ވަނަ އަހަރުގެ 142 ވަނަ ޤަޟިއްޔާގައި ކަނޑައަޅާފައިވާ އުޞޫލުތައް މި މައްސަލައަށް ޠަޠްބީޤުކުރަންޖެހޭނެކަމަށް ޤަބޫލުކުރެވޭތީ، މި ނިންމުން އިސްތިއުނާފުކުރެވިފައިވެއެވެ.

ދައުލަތުން ސިއްރުކުރުމަށް އެދިފައިވާ ހެކިތައް، އެކްސަސް ކޮންޓްރޯލްކޮށް، ކޯޓުން ކަނޑައަޅާ ވަކި ވަގުތުތަކެއްގައި، ލޮގް ބެލެހެއްޓޭނެ ނިޒާމެއް ހަމަ ޖެހިއްޖެނަމަ، ދިފާއީ ވަކީލަށް އެކަނި އެކްސަސް އޮންނާނެ ގޮތަށް، ދިފާއީ ވަކީލަށް ކޯޓުން ބޭރުގައި ހުރެގެން ލިޔުންތައް ބެލެނޭ އިންތިޒާމް ހަމަޖެއްސުމުގެ ފުރުސަތު ދިނުމަކީ ޤާނޫނު ނަންބަރު 19/2019 ގެ މަޤްޞަދާ ޚިލާފުވާ ނިންމުމެއްކަން ނުވަތަ ނޫންކަމާއި، ހައިކޯޓުގެ 2021 ވަނަ އަހަރުގެ 142 ވަނަ ޤަޟިއްޔާގައި ކަނޑައަޅާފައިވާ އުޞޫލާ ޚިލާފަށް ނިންމަވާފައިވާ މައްސަލައެއްކަން ނުވަތަ ނޫންކަން.

ދަށު ކޯޓުގެ ނިންމުން ބަދަލުކުރަންޖެހޭ ސަބަބެއް ނެތްކަމަށް ކަނޑައަޅުއްވި.