ޕްރޮސިކިއުޓަރ ޖެނެރަލްގެ އޮފީސް ވ. އިލްހާމް ޢަބްދުއްރަޙްމާން

• ޙާދިސާ: 2019 ވަނަ އަހަރުގެ އެކި ދުވަސްމަތިން އިލްހާމް ޢަބްދުއްރަޙްމާން، އޭނާގެ އަނބިމީހާއަށް ބޮޑުދައިތަ ކިޔާ 5 އަހަރުގެ ކުޑަކުއްޖަކާމެދު ޖިންސީ ޢަމަލު ހިންގައި، އޮރިޔާން މަންޒަރު ދައްކައި، އަދި އޭނާ ދިރިއުޅޭ ކޮޓަރިން އޮރިޔާންކާޑު ފެނުނު މައްސަލައެއްގައި ދައުލަތުން އޭނާގެ މައްޗަށް 3 ދައުވާއެއް ކުރިއެވެ:

  1. ކުޑަކުއްޖަކު އިތުބާރުކުރަންޖެހޭ މަގާމެއްގައި ހުރި މީހަކު އެ ކުޑަކުއްޖާއާއެކު ޖިންސީ ޢަމަލު ހިންގުމުގެ ކުށުގެ ދައުވާ.

  2. ކުޑަކުއްޖަކު އިތުބާރުކުރަންޖެހޭ މަގާމެއްގައި ހުރި މީހަކު، ޖިންސީ ޢަމަލެއް ބަޔަކު ހިންގާ މަންޒަރު އެ ކުޑަކުއްޖާއަށް ދެއްކުމުގެ ކުށުގެ ދައުވާ.

  3. އޮރިޔާންކާޑު ގެންގުޅުމުގެ ކުށުގެ ދައުވާ.

• މެޖިސްޓްރޭޓް ކޯޓާއި ހައިކޯޓުގެ ނިންމުން: މީދޫ މެޖިސްޓްރޭޓް ކޯޓުން އޮރިޔާންކާޑު ގެންގުޅުމުގެ ދައުވާ ސާބިތުވާކަމަށް ނިންމި ނަމަވެސް، ޖިންސީ ގޯނާގެ ދެ ދައުވާ ސާބިތުނުވާކަމަށް ޙުކުމް ކުރިއެވެ. އެއީ ކުއްޖާ ޝަފަހީ ހެއްކެއްގެ ގޮތުގައި ހުށަހަޅާފައި ނެތުމާއި، ކުއްޖާގެ އިންޓަވިއު ރެކޯޑިންގ ސީޑީ ކޮރަޕްޓްވެފައިވުމުން ކުއްޖާގެ ބަސް/ހެކިބަސް ސީދާ ޝަރީޢަތަށް ލިބިފައި ނެތުމުންނެވެ. ހައިކޯޓުންވެސް އަޣްލަބިއްޔަތުން ދަށު ކޯޓުގެ ނިންމުމަށް ތާއީދު ކުރިއެވެ.

• ސުޕްރީމް ކޯޓަށް އިސްތިއުނާފުކުރުން: ހައިކޯޓުގެ ނިންމުން ޤާނޫނާ ޚިލާފު ކަމަށް ބުނެ ޕްރޮސިކިއުޓަރ ޖެނެރަލްގެ އޮފީހުން ސުޕްރީމް ކޯޓުގައި މައްސަލަ އިސްތިއުނާފު ކުރިއެވެ.

1. ކުއްޖާގެ ސީދާ ބަޔާނެއް ނުވަތަ އިންޓަވިއު ރެކޯޑިންގެއް ނެތް ނަމަ، ތަޙުޤީޤަށްކުރި ފަރާތުގެ ބަޔާނުންނާއި ސައިކޮލޮޖިސްޓުގެ ރިޕޯޓުން ކުއްޖާގެ ޝަކުވާ އެނގެން އޮތުމުން، ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުސޫލުތަކަކަށް ޢަމަލުކުރުމުގެ ޤާނޫނުގެ 47 ވަނަ މާއްދާގެ ދަށުން ލުއި މިންގަނޑަކުން ހެކި ވަޒަންކުރެވިދާނެ ހެއްޔެވެ؟

2. ކުޑަކުދިންނަށް ޖިންސީ ގޯނާކުރުމުގެ މައްސަލަތަކުގައި އަނިޔާލިބުނު ކުޑަކުއްޖާ ސީދާ ޝަރީޢަތަށް ހާޟިރުކޮށްގެން ހެކިބަސް ނެގުމަކީ ލާޒިމު ކަމެއްތޯ ނުވަތަ އިޚްތިޔާރީ ކަމެއްތޯ؟

ސުޕްރީމް ކޯޓުގެ ފަނޑިޔާރުންގެ އިއްތިފާޤުން:

• މީދޫ މެޖިސްޓްރޭޓް ކޯޓުގެ ޙުކުމުން ޖިންސީ ގޯނާގެ ދެ ދައުވާ ސާބިތުނުވާކަމަށް ކަނޑައެޅި ބަޔާއި، ހައިކޯޓުގެ ތާއީދުކުރި ނިންމުން ބާތިލުކުރެއްވިއެވެ.

• ކުއްޖާގެ އިންޓަވިއު ރެކޯޑިންގ ކޮރަޕްޓްވެފައިވީ ނަމަވެސް، ފުލުހުންގެ ތަޙުޤީޤު ބަޔާނާއި ސައިކޮލޮޖިސްޓް ރިޕޯޓުން ކުއްޖާގެ ބަސް/ޝަކުވާގެ ތަފްސީލު ސާފުކޮށް އެނގެން އޮތުމުން ހެކި ވަޒަންކުރުމަށް ހުރަހެއް ނެތްކަމަށް ކަނޑައެޅުއްވިއެވެ.

• މައްސަލައިގައި ހުށަހެޅިފައިވާ ހެކިތަކުގެ މައްޗަށް ބިނާކޮށް އެ ދެ ދައުވާއަށް އަވަސް މިނެއްގައި ގޮތެއް ކަނޑައެޅުމަށްޓަކައި މައްސަލަ މެޖިސްޓްރޭޓް ކޯޓަށް ތަޙްވީލުކުރުމަށް ޙުކުމް ކުރެއްވިއެވެ.