ޕްރޮސިކިއުޓަރ ޖެނެރަލްގެ އޮފީސް ވ. މުޙައްމަދު ޝަނޫން

މި މައްސަލައަކީ، މުޙައްމަދު ޝަނޫން، ހީނާވިލާގެ، ލ. މުންޑޫ ގެ މައްޗަށް ދައުލަތުން އުފުލި ތޫނުއެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދައުވާ. މައްސަލައިގައި ކަން ހިނގާދިޔަ ގޮތަކީ، 20 ޑިސެންބަރު 2015 ދުވަހުގެ ރޭ 22:30 އެހާކަންހާއިރު، ލ. މުންޑޫ މަގުމަތީގައި ޢަލީ ސިފާމް އާއި ޢަލީ ޒިޔަދަމް (ލ. މުންޑޫ، ނޫވިލު) މާރާމާރީ ހިންގަމުންދަނިކޮށް، މުޙައްމަދު ޝަނޫން ވަޅިއަކުން ޢަލީ ޒިޔަދަމްގެ ފަޔަށް ހަމަލާދިނުމުން، ޒިޔަދަމް ދުވެފައި ގޮސް "ވަގުތީހިޔާ" ގެއަށް ވަނުމުން އޭނާގެ ފަހަތުން ގޮސް، ޒިޔަދަމްގެ ކަރަށާއި ބުރަކަށީގެ އެކި ތަންތަނަށް ވަޅިން ހަމަލާދީ މަރާލުމެވެ. ކްރިމިނަލް ކޯޓުގެ ނަންބަރު 325/Cr-C/2015 މައްސަލައިގައި 25 ޖަނަވަރީ 2023 ގައި، މުޙައްމަދު ޝަނޫންގެ މައްޗަށް ކުށް ސާބިތުވާކަމަށް ކަނޑައަޅައި، މަރަށް މަރުހިފުމަށް (ޤިޞާޞް ހިފުމަށް) ޙުކުމްކުރިއެވެ. ޤާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 1205 ވަނަ މާއްދާގެ ދަށުން، މަރުގެ އަދަބު ކަނޑައެޅޭ މައްސަލަތަކުގެ ނިހާއީކަން ކަށަވަރުކުރުމަށްޓަކައި ޕްރޮސިކިއުޓަރ ޖެނެރަލްގެ އޮފީހުން މި މައްސަލަ ހައިކޯޓަށް ހުށަހެޅިއެވެ.

ދިވެހިރާއްޖޭގެ ހައިކޯޓުގެ ފަނޑިޔާރުންގެ އިއްތިފާޤުން ކަނޑައެޅުއްވީ:

1. ދަށު ކޯޓުގައި މައްސަލަ ހިންގާފައިވަނީ ޤާނޫނުއަސާސީއާއި ޤާނޫނުން ކަށަވަރުކޮށްދޭ އަސާސީ ޙައްޤުތަކާއި އިޖުރާއަތްތަކާ އެއްގޮތަށް ކަމަށް. އަދި؛
2. ކްރިމިނަލް ކޯޓުގެ ނަންބަރު 325/Cr-C/2015 މައްސަލައިގައި މުޙައްމަދު ޝަނޫންގެ މައްޗަށް ކުށް ސާބިތުވާކަމަށް ކަނޑައަޅައި، އޭނާގެ މައްޗަށް މަރަށްމަރު ހިފުމަށް (ޤިޞާޞް ކުރުމަށް) ކްރިމިނަލް ކޯޓުން 25 ޖެނުއަރީ 2023 ގައި ކަނޑައަޅުއްވާފައިވާ ޙުކުމަކީ ޤާނޫނީ އަދި ޝަރުޢީ އުޞޫލުތަކާ އެއްގޮތަށް ކަނޑައަޅާފައިވާ ނިހާއީ ޙުކުމެއް ކަމަށް ކަނޑައަޅައި، އެ ޙުކުމަށް ތާއީދުކޮށް މައްސަލަ ނިންމެވީއެވެ.