ޕްރޮސިކިއުޓަރ ޖެނެރަލްގެ އޮފީސް ވ. މުޙައްމަދު ޒާހިރު

މި މައްސަލައަކީ ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ޤަޞްދުގައި އަތްލުމުގެ ކުށުގެ ދަޢުވާ އުފުލި މައްސަލައެކެވެ. މި ދަޢުވާ އުފުލާފައިވަނީ، ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްސަ އުޞޫލުތަކަކަށް ޢަމަލުކުރުމުގެ ޤާނޫނުގެ 3 ވަނަ މާއްދާގެ (ހ) އާ ޙަވާލާދީ، އެ މާއްދާގެ (ނ) ގެ ދަށުންނެވެ. ދަޢުވާ އުފުލާފައިވަނީ އިސްތިއުނާފު ރައްދުވާ ފަރާތް 2020 ވަނަ އަހަރުގެ ސެޕްޓެންބަރު މަހުގެ އެކި ދުވަސްމަތިން، ކުއްޖާ ލައިގެންހުރި އަންނައުނު މަތިން، އެ ކުއްޖާގެ ކުރިމަތިފަރާތުގައި އަތްލައި، އެ ކުއްޖާގެ ހަށިގަނޑުގައި ޖިންސީ ނިޔަތެއް އޮވެގެން ޤަޞްދުގައި އަތްލާފައިވާތީއެވެ.

ދަށު ކޯޓުން މި މައްސަލަ ނިންމާފައިވަނީ އިސްތިއުނާފު ރައްދުވާ ފަރާތުގެ މައްޗަށް ދައުލަތުން ކޮށްފައިވާ ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ޤަސްދުގައި އަތްލުމުގެ ކުށުގެ ދަޢުވާ، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 51 ވަނަ މާއްދާގެ (އ) ގައި ބުނާ އެކަށީގެންވާ ޝައްކެއް ނެތް މިންވަރަށް ސާބިތުނުވާކަމަށް ކަނޑައަޅައި ދަށު ކޯޓުން ޙުކުމްކޮށްފައިވެއެވެ.

މައްސަލަ އިސްތިއުނާފުކޮށްފައިވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 51 ވަނަ މާއްދާގެ (އ) ގައި ބުނާ މިންވަރަށް ހެކިބަސް ލިބިފައިވަނިކޮށް އެ ހެކިތަކަށް ރަނގަޅަށް ރިޢާޔަތްކުރުމެއްނެތި އަދި ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 143 ވަނަ މާއްދާގެ (ރ) ގައި "މަތީ މަރުޙަލާގެ ކޯޓުތަކުން ނިންމާ ނިންމުންތަކަށް އެއަށްވުރެ ދަށު މަރުޙަލާގެ ކޯޓުތަކުން ތަބާވާންވާނެ" ކަމަށް ބަޔާންކޮށްފައިވާ އުޞޫލާ ޚިލާފަށް ނިންމާފައިވާ ނިންމުމެއް ކަމަށްވާތީއެވެ.

• 1- ކުއްޖާ ޝަރީޢަތުގެ މަޖިލީހުން ބޭރުގައި ކިޔައިދިން ކިޔައިދިނުމާއި ޝަރީޢަތުގައި ކިޔައިދިން ކިޔައިދިނުމުގައި ފުށުއެރުންތައް ހުރުމުން، ހެކި ވަޒަންކުރުމުގައި ޢަމަލުކުރާނީ ކިހިނެތްތޯ؟

• 2- ކުއްޖާ ޝަރީޢަތުގައި ހެކިބަސްދެމުން ހާދިސާއަކީ ނުހިނގާ ހާދިސާއެއްކަމަށް ބުނެފިނަމަ، އޭގެ ސަބަބުން ކުއްޖާ ކުރިން ދައްކާފައިހުރި ވާހަކަތައް އެއްފަރާތް ކުރަންޖެހޭތޯއާއި، ކުއްޖާ ކުރިން ދެއްކި ވާހަކަތައް ހެކިބަހުގެ ގޮތުގައި ބޭނުންކުރެވިދާނެތޯ؟

ދަށު ކޯޓުގެ ޙުކުމް ބާޠިލުކުރައްވައި، މައްސަލަ ދަށު ކޯޓަށް ތަހުވީލުކުރެއްވި.