2017/HC-A/386

ސިވިލް ކޯޓުން، ޕޮލިސީގެ ކޮންޑިޝަން 20 ގައި ގެއްލުމުގެ ބަދަލުގެ އަދަދާ ބެހޭ ޚިލާފު ފުރަތަމަ އާބިޓްރޭޝަނަށް ހުށަހަޅަންޖެހޭނެކަމަށް ބުނާތީ، އާބިޓްރޭޝަން ޤާނޫނުގެ 15 (ހ) ގެ ދަށުން މައްސަލަ ކޯޓުގައި ކުރިއަށް ނުގެންދެވޭނެކަމަށް ޙުކުމްކުރިއެވެ.

ފަޔަރ ޕޮލިސީއެއްގެ ދަށުން ޓޯޓަލް ލޮސްގެ ޙާލަތުގައި ލިބެންޖެހޭ ފައިސާގެ ތެރެއިން ލިބިފައިވާ ފައިސާއާއި ޑިޑަކްޓިބަލް އުނިކުރުމުން ބާކީވާ 6,334,800 ރުފިޔާ އިންޝުއަރެންސް ކުންފުނީގެ އަތުން ހޯދުމަށް އިސްތިއުނާފުކުރި ކުންފުނިން ސިވިލް ކޯޓުގައި ދަޢުވާކުރިއެވެ.

އިސްތިއުނާފުކުރި ފަރާތް ބުނީ ކޮންޑިޝަން 20 އަކީ ބަދަލު ދިނުމަށް އެއްބަސްވުމަށްފަހު މިންވަރާ ބެހޭ ޚިލާފަށް ކަމަށާއި މި ދަޢުވާއަކީ ތަފާތު ޙާލަތެއް ކަމަށާއި، ޑިސްޕިއުޓް ރިޒޮލިއުޝަން މަރުޙަލާގައި ޝަރީޢަތުން ގޮތެއް ކަނޑައެޅުމަށް ދަޢުވާ ރައްދުވާ ފަރާތް އެދުމަކީ 15 (ހ) ގެ ޙައްޤު ދޫކޮށްލުން ކަމަށެވެ.

ގެއްލުމުގެ ބަދަލުގެ އަދަދާ ބެހޭ ޚިލާފު ފުރަތަމަ އާބިޓްރޭޝަނަށް ހުށަހަޅަންޖެހޭނެކަމަށް އިންޝުއަރެންސް ޕޮލިސީގައި ބުނެފައިވާއިރު، ޕޮލިސީގެ ދަށުން ބާކީ ފައިސާ ހޯދުމަށް ކުރި ދަޢުވާ އާބިޓްރޭޝަން ޤާނޫނުގެ 15 (ހ) ގެ ދަށުން ކޯޓުގައި ކުރިއަށް ނުގެންދެވޭނެކަމަށް ނިންމި ނިންމުން ރަނގަޅުތޯއާއި، ސިވިލް ކޯޓުގެ ޑިސްޕިއުޓް ރިޒޮލިއުޝަން މަރުޙަލާގައި މައްސަލަ ޝަރީޢަތަށް ފޮނުވުމަށް އެދުމަކީ އާބިޓްރޭޝަނުގެ ޙައްޤު ދޫކޮށްލުމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ޕޮލިސީ ބަލައިގަތުމުން އޭގެ ޝަރުޠުތަކަށް ތަބާވުން ލާޒިމްވާއިރު، ބާކީ ފައިސާ ހޯދުމަށް ކުރި ދަޢުވާއަކީ ކޮންޑިޝަން 20 ގެ ދަށުން ފުރަތަމަ އާބިޓްރޭޝަނަށް ހުށަހަޅަންޖެހޭ ބާވަތުގެ މައްސަލައެކެވެ. ޑިސްޕިއުޓް ރިޒޮލިއުޝަން މަރުޙަލާގައި ޝަރީޢަތަށް ފޮނުވުމަށް އެދުމަކީ އާބިޓްރޭޝަން އެއްބަސްވުމަށް ދޫދިނުމެއް ނޫނެވެ.