2016/HC-A/340

ސިފައިންގެ ވަޒީފާއިން ވަކިވުމުން ބިން އަތުލެވޭނެކަމަށް އެއްބަސްވުމުގައި ބަޔާންކޮށްފައިވާތީ، އެ އެންގުން ބާޠިލުކުރާނެ ޝަރުޢީ އަދި ޤާނޫނީ ހަމައެއް ނެތްކަމަށް ސިވިލް ކޯޓުން ކަނޑައެޅިއެވެ.

ސިފައިންގެ ވަޒީފާގައި ހުރިއިރު އަމިއްލަ ޚަރަދުގައި ގެ އަޅައިގެން ދިރިއުޅުމަށް ދޫކުރެވުނު ފުލެޓް/ބިމެއް، އޭނާ ވަޒީފާއިން ވަކިވެ ގާތްގަނޑަކަށް 20 އަހަރު ފަހުން، ޢިމާރާތުގެ ބަދަލެއް ނުދީ ހުސްކުރުމަށް އެމް.އެން.ޑީ.އެފް.އިން ސިޓީ ފޮނުވައި އެންގިއެވެ.

އިސްތިއުނާފުކުރި ފަރާތުން ބުނީ އެ ބިން ނެގޭނީ އަޅާފައިވާ ޢިމާރާތުގެ ޝަރުޢީ ބަދަލު ދިނުމަށްފަހު ކަމަށާއި، އެ އުޞޫލަށް ރިޢާޔަތް ނުކުރުމުން ޤާނޫނުއަސާސީން ކަށަވަރުކޮށްދޭ އިންޞާފުވެރިކަމާއި ހިޔާވަހިކަމުގެ ޙައްޤު ގެއްލިފައިވާ ކަމަށެވެ.

ސިފައިންގެ ވަޒީފާގައި ހުރިއިރު ދިރިއުޅުމަށް ދޫކުރެވުނު ފުލެޓް/ބިމެއް، ވަޒީފާއިން ވަކިވުމަށްފަހު، އެ ބިމުގައި އަމިއްލަ ޚަރަދުގައި އަޅާފައިވާ ޢިމާރާތުގެ ބަދަލު ނުދީ ހުސްކުރުމަށް އެންގުމަކީ ޤާނޫނީ އެންގުމެއްތޯއާއި، އެއީ ޤާނޫނުއަސާސީން ކަށަވަރުކޮށްދޭ ހިޔާވަހިކަމުގެ ޙައްޤާ ޚިލާފު ކަމެއްތޯ.

ދަށުކޯޓުގެ ޙުކުމް ބާޠިލު

ވަޒީފާއިން ވަކިވުމަށްފަހުވެސް ބިމުގައި ހުރެވުނީ އެތަން ހަމަޖައްސައިދީފައިވާތީކަން ޤަބޫލުކުރެވޭތީ، ބިން އަތުލުމުގައި ޢަމަލުކުރަންޖެހޭނީ ބަދަލު ދިނުމުގެ އުޞޫލާ އެއްގޮތަށް ކަމަށާއި، ބަދަލު ނުދީ ހުސްކުރަން އެންގުމަކީ އެ އުޞޫލާ ޚިލާފު ކަމެއް ކަމަށް ހައިކޯޓުން ބެލިއެވެ. ބިން އަތުލުމަކީ ހިޔާވަހިކަމުގެ ޙައްޤު ލިބިނުދިނުމެއް ނޫންކަމަށްވެސް ކަނޑައެޅިއެވެ.