ސައިޓޭޝަން ކޮޕީ ކުރުމަށް
2015/HC-A/379
2015/HC-A/379، 2015/HC-A/379
2015/HC-A/379 (2015/HC-A/379, High Court of the Maldives, 13 November 2017)
2015/HC-A/379
މައްސަލައިގެ ޚުލާޞާ
ކްރިމިނަލް ކޯޓުން މަސްތުވާތަކެއްޗާބެހޭ ޤާނޫނުގެ 116 ވަނަ މާއްދާގެ (ހ) ގެ ދަށުން ޓްރެފިކްކުރުމުގެ ކުށް ސާބިތުކޮށް 10 އަހަރު ޖަލަށްލުމާއެކު 50,000 ރުފިޔާގެ ޖޫރިމަނާއަށް ޙުކުމްކުރި.
މަސްތުވާތަކެތީގެ ވިޔަފާރިކުރާކަމުގެ މަޢުލޫމާތަކާ ގުޅިގެން ގެސްޓްހައުސް ކޮޓަރިއެއް ފުލުހުން ބަލައި ފާސްކުރިއިރު، ތުހުމަތުކުރެވޭ ފަރާތް ހުރި ކޮޓަރީގެ އެނދުދަށުން ފެނުނު ކޮތަޅެއްގައި 37.7235 ގްރާމް އެލްޕްރޮޒޯލަމް ހުރިކަން ތަޙްލީލު ރިޕޯޓުން ދެއްކިއެވެ.
އިސްތިއުނާފުކުރި ފަރާތުން ބުނީ، އެނދުދަށުން ފެނުނު ތަކެއްޗަށް އޭނާ ޒިންމާވާކަމަށް ބެލީ ސުޕްރީމް ކޯޓުގެ ޤަޟިއްޔާތަކުގެ އުޞޫލުތަކާ ޚިލާފަށް ކަމަށާއި، ދިފާޢީ ހެކިން ޙާޟިރުނުކޮށް މައްސަލަ ނިންމީ 2011/SC-A/36 ގެ އުޞޫލާ ޚިލާފަށް ކަމަށެވެ.
މައިގަނޑު ސުވާލު
ތުހުމަތުކުރެވޭ ފަރާތް ހުރި ގެސްޓްހައުސް ކޮޓަރީގެ އެނދުދަށުން ފެނުނު މަސްތުވާތަކެއްޗަށް އޭނާ ޒިންމާވާންޖެހޭތޯ (ޖަދުވަލު 2 ގައިވާ މަސްތުވާއެއްޗެއް ޓްރެފިކްކުރުން)؛ އަދި ދިފާޢީ ހެކިން ޙާޟިރުނުކޮށް މައްސަލަ ނިންމުމަކީ ޝަރުޢީ ޤާނޫނީ އުޞޫލުތަކާ ޚިލާފު ކަމެއްތޯ.
ނިންމި ގޮތް
އިސްތިއުނާފު ބާޠިލު، ދަށުކޯޓުގެ ޙުކުމް ޤާއިމް
ހިޔާޒަތުގެ ދަށުން ފެނުނު މަސްތުވާތަކެއްޗަށް ޒިންމާވާނެ އެހެން ފަރާތެއް ދައްކާފައި ނުވާތީ އޭނާ ޒިންމާވާންޖެހެއެވެ. ދިފާޢީ ހެކިވެރިޔާ ޙާޟިރުނުކުރި ސަބަބު ޝަރީޢަތް ނިމުނު ގޮތުގެ ރިޕޯޓުގައި ފާހަގަކޮށްފައިވާތީ ދަށުކޯޓުގެ ނިންމުން ޤާނޫނާ ޚިލާފެއް ނޫނެވެ.
ކަނޑައެޅުނު އުޞޫލުތައް
- މަނާކުރެވިފައިވާ މަސްތުވާ އެއްޗެއް މީހެއްގެ އަތުގައި ހުރުމަކީ އިސްތިސްނާއެއްނެތި މުޠުލަޤު މަސްއޫލިއްޔަތު ޤާނޫނީ ގޮތުން އުފުލަންޖެހޭ ކުށެކެވެ. (ޙުކުމްގެ ޕެރެގްރާފް ނަންބަރު 3(ނ))
- ކޮންމެ މީހަކީ އެމީހެއްގެ ހިޔާޒަތުގެ ދަށުގައި ހުންނަ ތަކެއްޗާމެދު ޝަރީޢަތާއި ޤާނޫނުގެ ކުރިމަތީގައި ޒިންމާ އުފުލަންޖެހޭ މީހެކެވެ. (ޙުކުމްގެ ޕެރެގްރާފް ނަންބަރު 3(ނ))
- މީހެއްގެ ހިޔާޒަތުގެ ދަށުން ފެންނަ މަސްތުވާތަކެއްޗާ ބެހޭ ގޮތުން ޝަރުޢީ ޤާނޫނީ ހަމަތަކުގެ މަތިން ޒިންމާއުފުލަންޖެހޭ ފަރާތެއް ނުދެއްކޭހާ ހިނދަކު، އެތަކެއްޗާމެދު ޝަރީޢަތާއި، ޤާނޫނުގެ ކުރިމަތީގައި ޒިންމާވާންޖެހެނީ އެމީހެއްގެ ހިޔާޒަތުގެ ދަށުން މަސްތުވާއެއްޗެއް ފެނުނު މީހާއެވެ. (ޙުކުމްގެ ޕެރެގްރާފް ނަންބަރު 3(ނ))
- ޖިނާއީ މައްސަލައެއްގައި ޝަރީޢަތަށް ހުށަހެޅޭ ހެކިތަކާއި، ޤަރީނާތަކުގެ ތެރެއިން މައްސަލައާ ގުޅުންހުރީ ކޮންހެކިތަކެއް ކަމާއި، ހެކި ހުށަހެޅެނީ ކޮންކަމެއް ސާބިތުކުރުމުގެ ބޭނުމުގައިކަން މައްސަލަ ބައްލަވާ ފަނޑިޔާރަކު ވަޒަން ކުރުމަށްފަހު ޝަރީޢަތުން ބަލައިގަނެވިދާނެ ހެކިތަކާއި، ބަލައި ނުގަނެވޭނެ ހެކިތައް އަދި ޝަރީޢަތަށް ޙާޟިރުކުރެވޭނެ ހެކިންނާއި، ޙާޟިރު ނުކުރެވޭނެ ހެކިން ފަނޑިޔާރުގެ ތަޤްދީރީ ބާރުގެ ތެރެއިން ކަނޑައެޅިދާނެއެވެ. (ޙުކުމްގެ ޕެރެގްރާފް ނަންބަރު 3(ރ))
- ޝަރީޢަތަށް ހުށަހަޅާ ހެކިތަކާއި، ދަލީލުތަކުގެ ތެރެއިން ބަލައިގަނެވެން ނެތްކަން ނުވަތަ ޝަރީޢަތުގެ މަޖިލީހަށް ޙާޟިރުކުރެވެންނެތް ހެކި ހުރިނަމަ އެކަން އެގޮތަށް ނިންމަންޖެހުނު ސަބަބެއް މައްސަލަ ބައްލަވާ ފަނޑިޔާރު އެމައްސަލައެއްގެ ޝަރީޢަތް ނިމުނު ގޮތުގެ ރިޕޯޓުގައި ފާހަގަކުރައްވަން ޖެހޭނެއެވެ. އަދި ހެކި ބަލައި ނުގަތުމަށާއި ހެކިން ޙާޟިރު ނުކުރަން ފަނޑިޔާރު ނިންމާފައިވާ ސަބަބަކީ، ޝަރުޢީ އަދި ޤާނޫނީ ހަމަތަކުގެ މަތިން އެކަށީގެންވާ ސަބަބެއް ކަމުގައިވެސް ވާންޖެހޭނެއެވެ. (ޙުކުމްގެ ޕެރެގްރާފް ނަންބަރު 3(ރ))
- ދިފާޢީ ހެކިވެރިޔަކީ މައްސަލައާ ގުޅިގެން ހެކިބަސް ނަގަންޖެހޭ ފަރާތެއްކަމަށް ޝަރީޢަތުން ޤަބޫލު ނުކުރާތީ ޙާޟިރުކޮށް ހެކިބަސް ނަގާފައި ނުވާކަން ޝަރީޢަތް ނިމުނު ގޮތުގެ ރިޕޯޓުގައި ފާހަގަކުރައްވާފައިވާނަމަ، އެ ޤަޟިއްޔާ ނިންމާފައިވަނީ ޝަރުޢީ ޤާނޫނީ އުޞޫލުތަކާ ޚިލާފަށް ކަމަށް ބެލެވެން ނެތެވެ. (ޙުކުމްގެ ޕެރެގްރާފް ނަންބަރު 3(ރ))
- ޤާނޫނު ނަންބަރު 2011/17 (މަސްތުވާތަކެއްޗާބެހޭ ޤާނޫނު) ގެ 116 ވަނަ މާއްދާގެ (ހ) އާއި (ނ)
- 2008/SC-A/08
- 2010/SC-A/07
- 2010/SC-A/24
- 2011/SC-A/36
- 2011/HC-A/192
- ބެންޗު
- ފަނޑިޔާރު ޢަބްދުﷲ ޙަމީދު، އިސްފަނޑިޔާރު ޢަބްދުﷲ ދީދީ، ފަނޑިޔާރު ޢަބްދުއްރައޫފު އިބްރާހީމް
- ޚިލާފު ރައުޔު
- ނެތް