2015/HC-A/325

ސިވިލް ކޯޓުން، ލޯނު ނެގި ފަރާތާއި ޔަޤީންކަން ދިން ފަރާތްތަކުން ލޯނުގެ ފައިސާ، ޤާނޫނީ ޚަރަދު، އިންޓަރެސްޓާއި ޖޫރިމަނާ 10 މަސްދުވަހުގެ ތެރޭގައި ދައްކަން ޙުކުމްކޮށް، ނުދައްކައިފިނަމަ ރަހުނުތައް ވިއްކުމުގެ ހުއްދަ ބޭންކުތަކަށް ދިނެވެ.

ސިންޑިކޭޓަޑް ލޯން އެއްބަސްވުމެއްގެ ދަށުން ތިން ބޭންކަކުން ކުންފުންޏަކަށް ޖުމްލަ 24 މިލިއަން ޑޮލަރުގެ ޑިމާންޑް ލޯނުތަކެއް ދޫކޮށް، އެ ލޯނަށް ކުންފުނިތަކަކާއި ފަރުދުންތަކަކުން ޔަޤީންކަން ދީ، ރިސޯޓުތަކާއި ޙިއްޞާ ރަހުނުކުރިއެވެ. އެއްބަސްވި ގޮތަށް ފައިސާ ނުދެއްކުމުން ލޯނު ނެގި ފަރާތާއި ޔަޤީންކަން ދިން ފަރާތްތަކުގެ މައްޗަށް ބޭންކް އޮފް މޯލްޑިވްސްއިން އަމިއްލަ ޙައިޘިއްޔަތާއި އޭޖެންޓުގެ ޙައިޘިއްޔަތުން ދަޢުވާކުރިއެވެ.

އިސްތިއުނާފުކުރި ފަރާތްތަކުން ބުނީ، ފޯމް CvC-007 އާ ޚިލާފަށް ދަޢުވާ ބަލައިގަތުމާ ގުޅޭ އިޖުރާއީ މައްސަލައަށް ގޮތެއް ނުނިންމާ ކަމަށާއި، ރަހުނު ވިއްކާލުމަކާ ނުލައި ޔަޤީންކަން ދިން ފަރާތްތަކުގެ މައްޗަށް ދަޢުވާ ކުރުމަކީ ރަހުނާބެހޭ ޤާނޫނުގެ 9 ވަނަ މާއްދާއާ ޚިލާފު ކަމެއް ކަމަށާއި، ކޮންމެ ފަރާތެއް ޒިންމާވާ މިންވަރު ބަޔާން ނުކުރުމަކީ ޤާނޫނުއަސާސީގެ ޙައްޤުތަކާ ޚިލާފު ކަމެއް ކަމަށެވެ.

ދަޢުވާ ފޯމާއެކު ބައެއް ލިޔުންތައް ހުށަނާޅާ ހުރުމުން ދަޢުވާ ބަލައިގަނެ ކުރިއަށް ގެންދިޔުން ބާޠިލުވޭތޯ، އަދި ސިންޑިކޭޓަޑް ލޯނަކަށް ޔަޤީންކަން ދިން ފަރާތްތަކުން، ރަހުނު ވިއްކާލުމަކާ ނުލައި، ލޯނު ނެގި ފަރާތާ އެކުއެކީގައި ލޯނުގެ ފައިސާއަށް ޒިންމާވާންޖެހޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ލޯނުގެ ފައިސާ ލިބުނުކަމަށް އިންކާރު ނުކުރާއިރު، ހުށަނާޅާ ލިޔުންތަކަކީ އިސްތިއުނާފުކުރާ ފަރާތްތަކުން ސޮއިކުރި އެއްބަސްވުންތަކުގެ ތަރުޖަމާކަމާއި، އެއްބަސްވުމުގެ ދަށުން ޔަޤީންކަން ދިން ފަރާތްތައް ލޯނު ނެގި ފަރާތާ އެއްހަމައެއްގައި ޒިންމާވާން އެއްބަސްވެފައިވާތީ، ދަށުކޯޓުގެ ޙުކުމަށް ބަދަލު ގެންނަ ސަބަބެއް ނެތްކަމަށް ކޯޓުން ކަނޑައެޅިއެވެ.