2015/HC-A/280

ސިވިލް ކޯޓުން (C/2013-647/Cv) ލިޔުމަކީ ޞައްޙަ ލިޔުމެއްކަން މަދަނީ މިންގަނޑުން ސާބިތުނުވާތީއާއި ފައިސާ ދިނުމަށް ކުންފުނިން ނިންމާފައިވާކަން ސާބިތުނުވާތީ ދަޢުވާ ސާބިތުނުވާ ކަމަށް ޙުކުމްކުރިއެވެ.

ކުންފުންޏަކާއި އެގްރޫޕުގެ އިތުރު ކުންފުނިތަކުން ހިންގި ޕްރޮޖެކްޓްތަކަށް ކޮންޓްރެކްޓްތައް ހޯދައިދިނުމުގެ ބަދަލުގައި ޕްރޮޖެކްޓްތަކުގެ ފައިދާގެ 25% ދިނުމަށް ކުންފުނިން އެއްބަސްވި ކަމަށް ބުނެ، 2008 ގައި ސޮއިކުރި ކަމަށް ބުނާ ލިޔުމެއްގެ މައްޗަށް ބިނާކޮށް އެފައިސާ ހޯދުމަށް ދަޢުވާކުރީއެވެ. ކުންފުނިން ލިޔުމުގެ ޞައްޙަކަން ދެކޮޅުހަދައި، ފައިސާ ދިނުމަށް ޑިރެކްޓަރުންގެ ބޯޑުން ނިންމާފައި ނުވާކަމަށް ބުންޏެވެ.

އިސްތިއުނާފުކުރި ފަރާތުން ބުނީ ލިޔުމަކީ ޞައްޙަ ލިޔުމެއްކަން ކުންފުނީގެ ޑިރެކްޓަރެއްގެ ބަހުން އެނގޭއިރު އެކަމަށް ރިޢާޔަތް ނުކުރުމަކީ ފަނޑިޔާރުންގެ ޤާނޫނު (13/2010) ގެ 5 ވަނަ މާއްދާއާ ޚިލާފު ކަމަށާއި، 'އިންޑޯ މެނޭޖްމަންޓް ރޫލް' އަށް ދަށުކޯޓުން ޢަމަލުނުކުރި ކަމަށެވެ.

ކުންފުންޏަކުން ސޮއިކުރި ކަމަށް ބުނާ ލިޔުމެއްގެ ޞައްޙަކަމާމެދު ސުވާލު އުފެދިފައިވާއިރު އެލިޔުމުގެ މައްޗަށް ބިނާކޮށް އެހެން ކުންފުނިތަކުގެ ޕްރޮޖެކްޓްތަކުގެ ފައިދާގެ ޙިއްޞާ އެކުންފުނިން ހޯދައިދެވޭތޯ، އަދި 'އިންޑޯ މެނޭޖްމަންޓް ރޫލް' ހިނގާ ޙާލަތެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް (އިސްތިއުނާފު ރައްދުވި ފަރާތުގެ ޣައިރު ޙާޟިރުގައި)

ލިޔުމުގެ ޞައްޙަކަމާ މެދު ކުންފުނިން އުފެއްދި ޝައްކު ބޮޑުކަމާއި އެ ޝައްކު ފިލުވާލުމުގެ ބުރަ އުފުލަންޖެހޭ ފަރާތުން ޤަބޫލުކުރެވޭ ހެކި ހުށަނާޅާތީ ލިޔުން ޞައްޙަކަން ސާބިތުނުވާ ކަމަށާއި، ކޮންމެ ކުންފުންޏަކީ ވަކި މަޢުނަވީ ޝަޚުޞެއް ކަމުން އެއްބަސްވުމެއް ނުވާ ކުންފުނިތަކުން ދައްކަންޖެހޭ ފައިސާ އެކުންފުނިން ދައްކަންޖެހޭނެ އަސާސެއް ނެތް ކަމަށާއި، އިންޑޯ މެނޭޖްމަންޓް ރޫލް ހިނގާ ޙާލަތެއް ނޫން ކަމަށް ކޯޓުން ކަނޑައެޅިއެވެ. ކޯޓަށް ޙާޟިރުވުމުގެ އަމުރު ލިބިހުރެ މަޤުބޫލު އުޒުރެއް ނެތި ރައްދުވި ފަރާތުގެ މަންދޫބު ޙާޟިރުނުވުމުން ޙުކުމްކުރީ އޭނާގެ ޣައިރު ޙާޟިރުގައެވެ.