ޢަލީ ޒިޔާދު ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން، ދަޢުވާގައި ޙުކުމެއް ކުރެވެންދެން ނުވަތަ ވަކިގޮތެއް ކަނޑައަޅަންދެން، މުޖުތަމަޢުގެ ސަލާމަތަށްޓަކައި ތުހުމަތުކުރެވޭ ފަރާތް ބަންދުގައި ބެހެއްޓުމަށް އަމުރުކުރިއެވެ.

ކުޑަކުދިންނަށް ޖިންސީ ގޯނާކުރުމުގެ ތުހުމަތުގައި ތަޙްޤީޤު މަރުޙަލާގައި ޝަރީޢަތް ނިމެންދެން ބަންދުކުރުމުގެ އަމުރެއް ނެރުނު ފަރާތެއްގެ ދަޢުވާ ނ. ލަންދޫ މެޖިސްޓްރޭޓް ކޯޓަށް ހުށަހެޅުމުން، ވީޑިއޯ ކޮންފަރެންސް ވަސީލަތާއި ޖާގަ ނެތުމާއި ތުހުމަތުކުރެވޭ ފަރާތް ހާޒިރުނުކުރެވުމުން، 5 ދުވަހުގެ ތެރޭގައި ކްރިމިނަލް ކޯޓަށް ހުށަހަޅަން އަންގައި މައްސަލަ ޕްރޮސިކިއުޓަރ ޖެނެރަލަށް އަނބުރާ ފޮނުވިއެވެ.

އިސްތިއުނާފުކުރި ފަރާތުން ބުނީ ކްރިމިނަލް ކޯޓަށް މައްސަލަ ބަލައިގަތް ގޮތް ޤާނޫނީ ނޫން ކަމަށާއި، ކުރީގެ އަމުރުގެ މުއްދަތު ހަމަވުމަށްފަހު އަމުރު ނެރެންދެން ބަންދުގައި ބެހެއްޓީ ޤާނޫނުއަސާސީގެ 46 ވަނަ މާއްދާއާ ޚިލާފަށް ކަމަށެވެ. ޕްރޮސިކިއުޝަނުން ބުނީ މައްސަލަ އަނބުރާ ފޮނުވުމަކީ ތަޙްވީލުކުރުން ނޫން ކަމަށާއި، މައްސަލަ ތާވަލުކުރެވެންދެން ހުރި ބަންދަކީ ޣައިރު ޤާނޫނީ ބަންދެއް ނޫން ކަމަށެވެ.

ކުޑަކުދިންނަށް ޖިންސީ ގޯނާކުރުމުގެ ތުހުމަތުގައި ޝަރީޢަތް ނިމެންދެން ބަންދުކުރެވިފައިވާ ފަރާތެއްގެ މައްސަލަ މެޖިސްޓްރޭޓް ކޯޓުން ޕްރޮސިކިއުޓަރ ޖެނެރަލަށް އަނބުރާ ފޮނުވުމަށްފަހު ކްރިމިނަލް ކޯޓަށް ހުށަހަޅައި، އެ ކޯޓުން ނެރުނު ބަންދުގެ އަމުރަކީ އިޚްތިޞާޞް ލިބިގެން، ޤާނޫނުއަސާސީގެ 46 ވަނަ މާއްދާއާ ޚިލާފުނުވާ ގޮތަށް ނެރުނު އަމުރެއްތޯ.

އިސްތިއުނާފު ބާޠިލް، ކްރިމިނަލް ކޯޓުގެ އަމުރު ޤާއިމް (އަޣުލަބިއްޔަތުން)

އަޣުލަބިއްޔަތުގެ ރައުޔުގައި، މައްސަލަ އަނބުރާ ފޮނުވީ ޝަރީޢަތްކުރުމާބެހޭ ޖިނާއީ އިޖުރާއަތުގެ ޤަވާޢިދުގެ 90 ވަނަ މާއްދާގެ ދަށުން ކަމަށާއި، ދިން މުއްދަތުގައި ކްރިމިނަލް ކޯޓަށް ހުށަހެޅުމުން ބަންދަކީ ޤާނޫނީ ބަންދެއް ކަމަށާއި، ބަންދާމެދު ގޮތެއް ކަނޑައެޅުމުގެ އިޚްތިޞާޞް ކްރިމިނަލް ކޯޓަށް ލިބިގެންވާ ކަމަށެވެ. ފަނޑިޔާރު މުޙައްމަދު ފައިޞަލް ދެކެވަޑައިގަތީ އަނބުރާ ފޮނުވުމަކީ ބާޠިލު ނިންމުމެއް ކަމަށާއި ބަންދަކީ ޤާނޫނުއަސާސީގެ 46 ވަނަ މާއްދާއާ ޚިލާފު ބަންދެއް ކަމަށެވެ.