ޢައިޝަތު އާޞިމް ވ. ޯލްޑިވްސް އިންލަންޑް ރެވެނިއު އޮތޯރިޓީ

މީރާގެ އިޢުތިރާޒު ނިންމުން ރަނގަޅުކަމަށް ޓެކްސް އެޕީލް ޓްރައިބިއުނަލްގެ 2 މެންބަރުންގެ އަޣުލަބިއްޔަތުން ކަނޑައެޅިއެވެ.

މީރާއިން ކުރި އޮޑިޓަކަށްފަހު، އިސްތިއުނާފުކުރި ފަރާތުގެ ނަމުގައި ރަޖިސްޓްރީކޮށް ހުޅުމާލޭގައި ހިންގާ ގެސްޓް ހައުސް އިނގިރޭސިވިލާތުގެ ވެބްސައިޓެއްގައި އިސްތިހާރުކުރުމަށް ދައްކާފައިވާ ފައިސާއިން ވިތްހޯލްޑިންގ ޓެކްސް ދައްކަންޖެހޭކަމަށް ޓެކްސް އެސެސްމަންޓް ނޯޓިސް ފޮނުވިއެވެ. ފައިސާ ދައްކާފައިވަނީ ގެސްޓް ހައުސްގެ މެނޭޖަރެއްގެ ގޮތުގައި ހިންގާ ފިރިމީހާގެ ނަމުގައިވާ ބޭރުގެ ކްރެޑިޓް ކާޑަކުންނެވެ.

އިސްތިއުނާފުކުރި ފަރާތުން ބުނީ، މުޢާމަލާތް ހިނގީ ރާއްޖޭގެ ޖުރިސްޑިކްޝަނުން ބޭރުގައި ކަމަށާއި، ޤާނޫނުއަސާސީގެ 52 ވަނަ މާއްދާއާ ޚިލާފަށް އިޢުތިރާފުތައް ހެކީގެ ގޮތުގައި ބޭނުންކޮށްފައިވާކަމަށާއި، ޓެކްސް ނެގީ ކައިވެނީގެ ގުޅުމަށް ބަލައިގެން ކަމަށާއި، ޓެކްސް ދައްކާ ފަރާތުގެ ޙައްޤުތަކާ ޚިލާފުވެފައިވާކަމަށެވެ. މީރާއިން ބުނީ، ރިޒޯޓު ނުވަތަ ވިޔަފާރި ހިންގާ ފަރާތުން އަމިއްލަ ތަން އިސްތިހާރުކުރުމަށް ދައްކާ ފައިސާއިން ވިތްހޯލްޑިންގ ޓެކްސް ދައްކަންޖެހޭ ކަމަށެވެ.

ވިޔަފާރި ވެރިފަރާތުގެ ނަމުގައި ރަޖިސްޓްރީކޮށްފައިވާ ގެސްޓް ހައުސް ބޭރުގެ ވެބްސައިޓެއްގައި އިސްތިހާރުކުރުމަށް ވެރިފަރާތުގެ ފިރިމީހާގެ ނަމުގައިވާ ބޭރުގެ ކްރެޑިޓް ކާޑަކުން ދައްކާފައިވާ ފައިސާއިން ޤާނޫނު ނަންބަރު 5/2011 ގެ 6 ވަނަ މާއްދާގެ ދަށުން ވިތްހޯލްޑިންގ ޓެކްސް ދައްކަންޖެހޭނީ ވިޔަފާރީގެ ވެރިފަރާތުންތޯއާއި، މީރާގެ އޮޑިޓަށް ޓެކްސް ދައްކާ ފަރާތުން ހުށަހެޅި ލިޔުންތަކަށް ބިނާކުރުމަކީ ޤާނޫނުއަސާސީގެ 52 ވަނަ މާއްދާއާ ޚިލާފު ކަމެއްތޯ.

އިސްތިއުނާފު ބަލައިނުގަނެ، ޓެކްސް އެޕީލް ޓްރައިބިއުނަލްގެ ނިންމުން ޤާއިމް

ފައިސާ ދައްކާފައިވަނީ ފިރިމީހާގެ ކާޑުން ނަމަވެސް، އެއީ ވެރިފަރާތުގެ ނަމުގައި ރަޖިސްޓްރީކޮށްފައިވާ ވިޔަފާރީގެ މަންފާއަށް ކުރި މުޢާމަލާތެއް ކަމުން ޓެކްސް ދައްކަންޖެހޭނީ ވިޔަފާރީގެ ވެރިފަރާތުންނެވެ. ލިޔުންތައް ހުށަހެޅީ އަމިއްލައަށް، މަޖުބޫރުކުރުމެއް ނެތި ކަމުން ޤާނޫނުއަސާސީގެ 52 ވަނަ މާއްދާގެ ދިފާޢު ޠަޠްބީޤު ނުކުރެވޭނެއެވެ.