އައިމަން ޢަބްދުއްސައްތާރު ވ. ޕްރޮސިކިއުޓަރ ޖެނެރަލްގެ އޮފީސް

ކްރިމިނަލް ކޯޓުން، މުޖުތަމަޢުގެ ސަލާމަތާއި ރައްކާތެރިކަމަށްޓަކައި، ތުހުމަތުކުރެވޭ ފަރާތް 10 ދުވަހަށް ހޯމް މިނިސްޓްރީން ކަނޑައަޅާ ތަނެއްގައި ބަންދުކޮށްފައި ބެހެއްޓުމަށް އަމުރުކުރި.

އިމިގްރޭޝަންގެ އޮންލައިން ސިސްޓަމެއް މެދުވެރިކޮށް ފޯޖްކުރި ލިޔުންތައް ހުށަހަޅައިގެން ބިދޭސީން ރާއްޖެއަށް ގެނައުމުގެ (ޞައްޙަ ލިޔުމަށް ބަދަލުގެނައުމާއި ފޯޖަރީ) ތުހުމަތުގައިވާ ފަރާތެއްގެ ބަންދުގެ މުއްދަތު އިތުރުކުރުމަށް ފުލުހުން ކްރިމިނަލް ކޯޓަށް ހުށަހެޅި.

އިސްތިއުނާފުކުރި ފަރާތުން ބުނީ، ބަންދުގައި ބަހައްޓަންޖެހޭ ސަބަބު ފުލުހުން ބުނެދީފައިނުވާއިރު ނެރުނު އަމުރަކީ ޤާނޫނުއަސާސީގެ 49 އާއި ޤަވާޢިދުގެ 7(ހ) އާއި 2010/SC-A/19 އާ ޚިލާފު އަމުރެއްކަމަށާއި، ޟަރޫރަތަށް ރިޢާޔަތްނުކޮށް ޤާނޫނުއަސާސީގެ 21 ވަނަ މާއްދާގެ ޙައްޤުތައް ހިފެހެއްޓިކަމަށް؛ ތުހުމަތަކީ މުޖުތަމަޢަށް ނުރައްކާތެރި ޢަމަލެއް ނޫންކަމަށް. ދައުލަތުން ބުނީ، ބަންދުގެ މަޖިލީހުގައި ފުލުހުން އެ ސަބަބު ފާހަގަކޮށްފައިވާނެކަމަށް.

ޞައްޙަ ލިޔުމަށް ބަދަލުގެނައުމާއި މަކަރުވެރި ޢަމަލު (ފޯޖަރީ) ގެ ތުހުމަތުގައިވާ ފަރާތެއް، މުޖުތަމަޢުގެ ސަލާމަތާއި ރައްކާތެރިކަމަށްޓަކައިކަމަށް ބުނެ ބަންދުގައި ބެހެއްޓުމަށް ކްރިމިނަލް ކޯޓުން ނެރުނު އަމުރަކީ ޤާނޫނުއަސާސީގެ 49 ވަނަ މާއްދާއާއި ބަންދާމެދު ގޮތެއް ނިންމުމުގެ ޤަވާޢިދުގެ 7 ވަނަ މާއްދާއާއި ސުޕްރީމް ކޯޓުގެ 2010/SC-A/19 އާ ޚިލާފު އަމުރެއްތޯ.

އިސްތިއުނާފު ބާޠިލް، ދަށުކޯޓުގެ އަމުރު ޤާއިމް

މުޖުތަމަޢުގެ ސަލާމަތާއި ރައްކާތެރިކަމަކީ ޤާނޫނުއަސާސީގެ 49 އާއި ޤަވާޢިދުގެ 7(ހ) ގެ ދަށުން ބަންދުގައި ބެހެއްޓުމަށް ޖާއިޒު ސަބަބެއްކަމާއި، ކުށުގެ ބާވަތާއި ކުޑަބޮޑު މިނާއި ތަޙުޤީޤުގެ އުނދަގޫތަކަށް ބަލާއިރު ބަންދުގެ ޟަރޫރަތެއް ނެތްކަމަށް ބެލެވެން ނެތުމުން، އަމުރަށް ބަދަލު ގެންނަންޖެހޭ ސަބަބެއް ނެތްކަމަށް ކޯޓުން ކަނޑައެޅި.