އަޙްމަދު ނަސީމް ވ. ޞާބިރާ ޔޫސުފް

ސިވިލް ކޯޓުން ނިންމީ މުޢާމަލާތު ހިނގި ތާރީޚާއި ނިޔާވި ތާރީޚާ ދެމެދު ދިގު މުއްދަތެއް ފާއިތުވި ނަމަވެސް ދުނިޔޭގައި ދަޢުވާއެއް ނުވަތަ ޝަކުވާއެއް ހުށަހަޅާފައިނުވާތީއާއި، އެއްބަސްވުމެއް އޮތްކަމަށް ކިތާބީ ހެއްކެއް ނެތުމުން ވާރިސުންގެ މައްޗަށް ދަޢުވާކުރުމުގެ ޙައްޤު ނުލިބޭނެކަމަށެވެ.

ހުޅުމާލޭގެ ގޯއްޗެއް ގަތުމުގެ މުޢާމަލާތުގައި މެދުވެރިވުމުގެ އުޖޫރައިގެ ގޮތުގައި ނިޔާވެފައިވާ މީހަކު ދިނުމަށް އަނގަބަހުން އެއްބަސްވި ކަމަށް ބުނާ 2,508,000 ރުފިޔާގެ ތެރެއިން ބާކީ 2,304,000 ރުފިޔާއާއި ވަކީލު ފީ، އޭނާގެ ވާރިސުންގެ ކިބައިން ހޯދުމަށް އިސްތިއުނާފުކުރި ފަރާތުން ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ޙުކުމް ބިނާކުރި ސަބަބާ މެދު ވާހަކަދެއްކުމުގެ ފުރުޞަތު ނުލިބުނުކަމަށާއި، ތަރިކައިގެ ދަޢުވާއަކީ ލިޔެކިޔުމުގެ މައްޗަށް ހަމައެކަނި ކުރާ ދަޢުވާއެއް ނޫންކަމަށާއި، ކޮންޓްރެކްޓު އަނގަބަހުން ވެވޭތީ ޝަފަހީ ހެކި ހުށަހެޅުމުގެ ފުރުޞަތު ނުދިނީ ކޮންޓްރެކްޓާބެހޭ ޤާނޫނުގެ 4 ވަނަ މާއްދާއާ ޚިލާފަށްކަމަށާއި، އިޖުރާއީ އަޑުއެހުމަކަށްފަހު މައުޟޫޢަށް ނިންމުމަކީ ޤާނޫނުއަސާސީގެ 42 (ށ) އާ ޚިލާފު ކަމެއްކަމަށެވެ.

ނިޔާވެފައިވާ މީހަކާ ވެފައިވާ ކަމަށް ބުނާ އަނގަބަހުން ވެފައިވާ މެދުވެރިކަމުގެ އުޖޫރައިގެ އެއްބަސްވުމެއްގެ މައްޗަށް، ޝަފަހީ ހެކި ފިޔަވައި އެހެން ބައްޔިނާއެއް ނެތި، އޭނާގެ ވާރިޘުންގެ މައްޗަށް ދަޢުވާކުރެވޭނެތޯއާއި، ދަށުކޯޓުން މައުޟޫޢަށް ވާހަކަދެއްކުމުގެ ފުރުޞަތު ނުދީ އިޖުރާއީ އަޑުއެހުމަކަށްފަހު ދަޢުވާ ނިންމުމަކީ އިންޞާފުވެރި ޝަރީޢަތާ ޚިލާފު ކަމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް (އަޣލަބިއްޔަތުން)

އަޣލަބިއްޔަތުގެ ރައުޔުގައި، ދަޢުވާ އަޞްލު ރައްދުވާ ފަރާތް ނިޔާވެފައިވާތީ ޝަފަހީ ހެކި ފިޔަވައި އެހެން ބައްޔިނާއެއް ހުށަހަޅަންޖެހޭ ކަމަށާއި، ފައިސާ ދެއްކިކަމުގެ ލިޔުމެއް ނުވަތަ ބޭންކް ޓްރާންސެކްޝަނެއް ނެތުމުން ދަށުކޯޓުން ދަޢުވާ ނިންމީ ރަނގަޅަށް ކަމަށް ކަނޑައެޅިއެވެ.