އަޙްމަދު އާމިރު ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ތިން މީހުންވެސް ކުށްވެރިކޮށް، އަޙްމަދު އާމިރު 10 އަހަރު ޖަލަށްލުމަށް ޙުކުމްކުރިއެވެ.

2015 ސެޕްޓެމްބަރ 28 ގައި ރިޔާސީ ލޯންޗު ފިނިފެންމާ ޢިއްޒުއްދީން ފާލަމާ ގާތްކުރިއިރު އައި.އީ.ޑީ އެއް ގޮވައި މީހުންނަށް އަނިޔާވެ ލޯންޗަށް ގެއްލުންވި ކަމަށް ބުނެ، އަޙްމަދު އާމިރު ހިމެނޭ ތިން މީހެއްގެ މައްޗަށް ޓެރަރިޒަމްގެ ދަޢުވާ ކުރިއެވެ.

އިސްތިއުނާފުކުރި ފަރާތުން ބުނީ، ޝައްކުން އެއްކިބާވާ މިންވަރަށް ދަޢުވާ ސާބިތުނުވާކަމަށާއި، ފުރިހަމަ ޝަރީޢަތެއްގެ ޙައްޤުތައް ގެއްލުނު ކަމަށާއި، ލޯންޗުގައި ފަހުން ދަތުރުކުރުމާއި ސެކިއުރިޓީ ޗެކްކުރުމުން ޝައްކު އުފެދޭ ކަމަށެވެ.

ގުޅިގެން ޝަރީޢަތް ހިންގި ޓެރަރިޒަމްގެ މައްސަލައެއްގައި، އެއް ތުހުމަތުކުރެވޭ ފަރާތެއްގެ ބައި ޣައިރުދުސްތޫރީ ކަންތައްތަކުގެ ސަބަބުން އަލުން ބެލުމަށް ފޮނުވާފައިވާއިރު، އެހެން ކުށްވެރިކުރެވުނު ފަރާތުގެ ބައިވެސް ބާޠިލުކޮށް އަލުން ބަލަން ފޮނުވަންޖެހޭތޯއާއި، އަލުން ބަލަންދެން ތުހުމަތުކުރެވޭ ފަރާތުގެ ބަންދާމެދު ގޮތް ކަނޑައަޅަންވީ ގޮތް.

ދަށުކޯޓުގެ ޙުކުމުގެ އަޙްމަދު އާމިރު އާ ގުޅޭ ބައި ބާޠިލުކޮށް އަލުން ބެލުމަށް ފޮނުވި؛ 15 ދުވަހަށް ރިމާންޑް ޖަލުގައި ބަންދުކުރުމަށް (އަޣްލަބިއްޔަތު)

މައްސަލަ ތިން މީހުންގެ މައްޗަށް އެކުގައި ހިންގައި ހެކި އެކުގައި ވަޒަންކޮށްފައިވާއިރު، ސުޕްރީމް ކޯޓުގެ 2018/SC-SJ/01 އަމުރުގެ ދަށުން ނުފޫޒު ފޯރުވައިގެން ހިންގި ޝަރީޢަތެއްކަމަށް ބެލެވޭތީ، 2016/HC-A/567 ގައި އަޙްމަދު އަދީބުގެ ބައި އަލުން ބަލަން ފޮނުވި ޚަލަލު އަޙްމަދު އާމިރު ގެ ބައިގައިވެސް ހުރިކަމަށް ބަލައި ޙުކުމުގެ އެބައި ބާޠިލުކުރިއެވެ.