ޢަބްދުއްރަޙްމާން ރަފީޢު ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ދަޢުވާ ސާބިތުވާކަމަށް ކަނޑައަޅައި، އިޢުތިރާފަށް 1 ދަރަޖަ ދަށްކުރުމަށްފަހު، އަދަބު ކަނޑައެޅުމުގެ އުޞޫލުގެ 6 (ހ) ގެ ދަށުން އަދަބު 2 ގުނަކޮށް 1 އަހަރާއި 2 މަހާއި 12 ދުވަހުގެ ޖަލު އަދަބު ކަނޑައެޅިއެވެ.

ފުލުހެއްގެ ޙައިޞިއްޔަތުގައި ހުރި އިސްތިއުނާފުކުރި ފަރާތުގެ މައްޗަށް ޤާނޫނުލްޢުޤޫބާތުގެ 411 ވަނަ މާއްދާގެ ދަށުން އެއްޖިންސުން ޖިންސީ ގުޅުން ހިންގުމުގެ ދަޢުވާ ކުރުމުން، އެ ފަރާތް ކުށަށް އިޢުތިރާފުވިއެވެ. (ކަންހިނގި ގޮތުގެ ތަފްޞީލު ޢާއްމު ކުރެވިފައިވާ ރިޕޯޓުން އުނިކޮށްފައި)

އިސްތިއުނާފުކުރި ފަރާތުން ބުނީ އަދަބު މަތިކުރުމުގެ ޤާނޫނީ ސަބަބެއް ނެތްކަމަށާއި، ދައުލަތުން އެދިފައި ނުވާއިރު އުޞޫލުގެ 5 (ނ) އާ ޚިލާފަށް އަދަބު 2 ގުނަކޮށްފައިވާ ކަމަށެވެ. ދައުލަތުން ބުނީ ގުނަކުރުމަކީ ޤާނޫނާ ނުބައްދަލުވާ ކަމެއް ކަމުން އަދަބު ތާވަލުގެ ދަރަޖައިން މަތިކުރަންވީ ކަމަށާއި، ފަނޑިޔާރުގެ ތަޤްދީރީ އިޚްތިޔާރު ޤައިދުކުރެވިފައި ނުވާކަމަށެވެ.

ޝަރީޢަތުން އަދަބު ކަނޑައެޅުމުގައި ޢަމަލުކުރާނެ ގޮތުގެ އުޞޫލު (02/2021) ގެ 6 ވަނަ މާއްދާގެ (ހ) ގެ ދަށުން އަދަބު މަތިކުރުމުގައި ކަނޑައެޅޭ އަދަބު 2 ގުނަކޮށްގެން އަދަބު ކަނޑައެޅުމަކީ ޤާނޫނުލްޢުޤޫބާތާ އެއްގޮތްވާ ކަމެއްތޯ، އަދި އަދަބު މަތިކުރި ސަބަބުތައް ޤާނޫނީ ހަމަތަކާ އެއްގޮތްތޯ.

ބައެއް ބަދަލުކުރި (2 ގުނަކުރި ބައި ބާޠިލުކޮށް، އަދަބު 1 އަހަރުގެ ޖަލު އަދަބަށް އިޞްލާޙުކުރި)

ޤާނޫނުލްޢުޤޫބާތުގައި އަދަބު ގުނަކުރުމެއް ނެތުމުން، އުޞޫލާއި ޤާނޫނު ފުށުއަރާއިރު ޤާނޫނު ދެމިއޮންނާތީ، 2 ގުނަކުރުމުގެ ބަދަލުގައި ތާވަލުގެ 2 ދަރަޖަ މަތިކުރަންޖެހޭތީ އަދަބު 1 އަހަރަށް އިޞްލާޙުކުރިއެވެ. އަދަބު މަތިކުރި ސަބަބުތަކަށް ކޯޓުން ތާއީދުކުރިއެވެ.